Real Madrid រីករាយពេលឃើញ Bale លេងបានល្អឱ្យ Spurs
(BC-99)
ការបង្ហាញទម្រង់លេងបានល្អឡើងវិញរួមជាមួយការស៊ុតបាល់បញ្ចូលទីបានជាបន្តបន្ទាប់ឱ្យក្រុម Tottenham Hot Spurs បានធ្វើឱ្យក្រុមអធិរាជស Real Madrid បាននូវក្តីរីករាយចំពោះកីឡាករ Gareth Bale ។
លាយឡំនិងភាពរីករាយ Real Madrid ក៏ជឿជាក់ដែរថាទម្រង់លេងរបស់ Bale នឹងធ្វើឱ្យ Spurs បន្តកិច្ចសន្យាខ្ចីកីឡាករសញ្ជាតិវែលហ៍រូបនេះមួយរដូវកាលទៀតដែលវាយ៉ាងហោចណាស់ក៏បានជួយសម្រួលដល់ការបង់ប្រាក់ខែខ្លះរហូតដល់កិច្ចសន្យារបស់គេត្រូវបញ្ចប់នៅ អេស្ប៉ាញ នៅឆ្នាំ២០២២។
តាមពិតទៅកីឡាករវ័យ ៣១ ឆ្នាំរូបនេះបានត្រៀមខ្លួនជាស្រេចក្នុងការចាកចេញពី Real Madrid តាំងពីឆ្នាំ ២០១៩ មកម៉្លេះតែអ្វីៗមិនអាចកើតឡើងបានឡើយដោយសារតែ Real Madrid បានទាមទារថ្លៃខ្លួនហួសប្រមាណ។ សេណារីយ៉ូដ៏ល្អបំផុតសម្រាប់ពួកគេនៅពេលនេះគឺអនុញ្ញាតិឱ្យ Bale ចាកចេញនៅរដូវកាលក្រោយដោយមិនគិតថ្លៃតែ Real Madrid ខ្លួនឯងនៅតែមានកាតព្វកិច្ចបង់ថ្លៃពលកម្ម ៦០ ម៉ឺនផោនក្នុងមួយសប្តាហ៍ពេញមួយឆ្នាំទៀត។
វាជារឿងល្អរបស់ Real Madrid ប្រសិនបើលោក Mourinho នៅតែពេញចិត្ត Bale និងមានបំណងខ្ចីរូបគេមួយរដូវកាលទៀត ព្រោះគេអាចកាត់បន្ថយការចំណាយរបស់ខ្លួនបានពាក់កណ្តាល។ តែវានឹងក្លាយជារឿងអាក្រក់ប្រសិនបើ Real យក Bale ត្រឡប់មកវិញដោយមិនឱ្យចូលលេងតែត្រូវរ៉ាប់រងការចំណាយរហូតដល់កិច្ចសន្យាត្រូវបញ្ចប់។
