វិទ្យុជាតិឡាវបានផ្សាយនៅព្រឹកថ្ងៃចន្ទ ទី១០ ខែមករា ឆ្នាំ២០២២ នេះថា កីឡាករឡាវចំនួន៤៥នាក់ត្រូវបានសហព័ន្ធកីឡាបាល់ទាត់ពិភពលោកដាក់បម្រាមមិនឲ្យពាក់ព័ន្ធនឹងសកម្មភាពបាល់ទាត់អស់មួយជីវិត។

អ្នកនាង Kanya Keomany អគ្គលេខាធិការសហព័ន្ធបាល់ទាត់ឡាវ បានប្រកាសថា “៖ ពួក​គេ​ត្រូវ​បាន FIFA ព្យួរ​អស់​មួយ​ជីវិត​បន្ទាប់​ពី​ការ​ស៊ើបអង្កេត​លើ​ការកំណត់លទ្ធផលទុកជាមុន។ វាបានកើតឡើងជាច្រើនឆ្នាំ និងមានករណីផ្សេងៗគ្នាជាច្រើនក្នុងការប្រកួតជើងឯកថ្នាក់ជាតិ។”

អត្តសញ្ញាណ​កីឡាករ​ទាំង ៤៥​នាក់​ដែល​ត្រូវ​ព្យួរ​នេះ មិន​ត្រូវ​បាន​គេ​បង្ហាញ​ជា​សាធារណៈ​ទេ។ យ៉ាង​ណា​មិញ ប្រភព​ខ្លះ​និយាយ​ថា បញ្ហានេះ​អាច​ប៉ះ​ពាល់​ដល់​ការ​ប្រកួត​អន្តរជាតិ​ផង​ដែរ។

នេះមិនមែនជាលើកទី១ទេដែលឡាវជួបបញ្ហាខាងលើ។ កន្លងមកកីឡាករជាច្រើនទាំង​ជម្រើសជាតិ និងមិនមែនជម្រើសជាតិបានរងបម្រាមអស់ពីជីវិតបែបនេះពាក់ព័ន្ធនឹងការគិតលទ្ធផលទុកជាមុន។ មិនតែប៉ុណ្ណោះសូម្បីមន្ត្រីបាល់ទាត់ឡាវក៏ធ្លាប់មានអ្នកទទួលរងបម្រាមពី FIFA ថែមទៀត៕