Maguire និយាយថា Pogba និង Fernandes នឹងរួមគ្នានៅជាមួយបិសាចក្រហម Man Utd
(BC-99)
Harry Maguire បានចេញមកបញ្ជាក់ពីក្តីរំពឹងរបស់ខ្លួនអំពីភាពជាដៃគូរវាង Paul Pogba និង Bruno Fernandes សហការគ្នាជួយក្រុម Manchester United ចាប់ពីរដូវកាលក្រោយ។
Maguire ជឿជាក់ថា Fernandes បានផ្តល់នូវអ្វីដែលថ្មីនៅក្នុងតំបន់បម្រើកណ្តាលរបស់បិសាចក្រហមហើយរូបគេនិង Pogba នឹងសហការគ្នាបន្តធ្វើឱ្យមានភាពល្អប្រសើរដល់ក្រុមគ្រប់ៗការប្រកួត។
បន្ទាប់ពីជម្នះបាននូវឧបសគ្គដ៏ចម្រូងចម្រាស់ នៅទីបំផុត Fernandes ក៏បានចាកចេញពី Sporting CP មកដល់ទឹកដី Old Trafford ដូចបំណងកាលពីខែមករាក្នុងកិច្ចព្រមព្រៀងមួយដែលមានតំលៃរហូតដល់ទៅ ៦៧.៦ លានផោន (៨០ លានអឺរ៉ូ) ដោយស៊ុតបញ្ចូលទីបាន ៣ គ្រាប់និងបានបង្កើតឱកាស ៤ គ្រាប់បន្ថែមទៀតក្នុងការបង្ហាញខ្លួនចំនួន ៩ ដងនៅក្នុងការប្រកួតទាំងអស់។ ក៏ប៉ុន្តែងាកមក Pogba ដែលបានបង្ហាញខ្លួនត្រឹមតែ ៨ ដងក្នុងរដូវកាលនេះដោយសារបញ្ហារបួសបែរជាមិនទាន់ជាសះស្បើយនិងមិនមានឱកាសចូលរួមសហការគ្នាជាមួយកីឡាករព័រទុយហ្កាល់បានទៅវិញ។
នៅពេលត្រូវបានសួរអំពី Fernandes ប្រធានក្រុម Maguire បានឆ្លើយទៅកាន់ Sky Sports ថា “គេគឺជាកីឡាករដែលពូកែតាំងពីគេចូលមកដល់តំបូងម៉្លេះ។ Fernandes ជាកីឡាករដែលមានមហិច្ឆតាខ្ពស់និងចង់ឈ្នះរាល់ការប្រកួត។ គេគឺជាមនុស្សដែលមានអាកប្បកិរិយាល្អ។ គេបានផ្តល់ឱ្យយើងបន្ថែមនូវការច្នៃប្រឌិតនៅតំបន់កណ្តាល។ ប្រសិនបើ Paul ត្រឡប់មកវិញទៀតប្រហែលជាក្រុមរបស់យើងលេងកាន់តែខ្លាំងជាងនេះ។ គេទាំងពីរប្រាកដជាអាចបង្កើតឱកាសឱ្យខ្សែប្រយុទ្ធស៊ុតបាល់បញ្ចូលទីបានច្រើនជាពុំខាន” ។
Harry Maguire ដែលបានប្តូរមកពី Leicester City កាលពីឆ្នាំមុននេះក៏បានលើកឡើងបន្ថែមនូវការពង្រឹងតំបន់ការពារក៏ជាកត្តាសំខាន់ដែរសម្រាប់ក្រុមដែលដឹកនាំរៀមច្បង Ole Gunnar Solksjaer ជាក់ស្តែងបើទោះជាពួកគេមាន Luke Shaw, Aaron Wan-Bissaka, Victor Lindelof, Eric Bailly និងរូបគេផ្ទាល់ក៏ដោយក៏បញ្ហារបួសរបស់ខ្សែការពារមួយចំនួននៅតែជាចំនុចអាក្រក់និងជាបញ្ហាចោទដែលមិនអាចអោយពួកគេរួមសហការគ្នាបានល្អ។
