កីឡាករចំបាប់កម្ពុជា ស៊ូ បាលី បានអស់ឱកាសប្រជែងកៅអីព្រឹត្តិការណ៍អូឡាំពិក ឆ្នាំ២០២៤ ហើយប្រកួតចាញ់កីឡាកររុស្ស៊ី Abdulla Kurbanov ដោយពិន្ទុ កាលពីល្ងាចថ្ងៃទី១៧ ខែកញ្ញា ឆ្នាំ២០២៣ នៅក្នុងការប្រកួតជើងឯកពិភពលោក នៅប្រទេសស៊ែប៊ី ប៉ុន្តែនេះជាការបោះជំហានថ្មីមួយរបស់ប្រភេទកីឡាចំបាប់កម្ពុជាជាលើកដំបូង ក្នុងព្រឹត្តិការណ៍ពិភពលោកនេះ។

លោក Casey Barnnett អនុប្រធាន​សហ​ព័ន្ធកីឡាចំបាប់កម្ពុជា ដែលដឹកនាំកីឡាករ ស៊ូ បាលី ប្រកួតជើងឯកពិភពលោក នៅប្រទេស​ស៊ែប៊ីគូសបញ្ជាក់ថា កីឡាករ ស៊ូ បាលី បានប្រកួតចាញ់ការប្រកួតដំបូងជាមួយកីឡាករហ្ស៊កហ្ស៊ី Geno Petriashvili ដែលជាម្ចាស់មេដាយមាសកីឡាអូឡាំពិក ឆ្នាំ២០២០ នៅប្រទេសជប៉ុន និង​បន្តចាញ់ការប្រកួតកីឡាកររុស្ស៊ី។

ថ្នាក់ដឹកនាំដដែលបានបន្តថា នេះ​ជា​លើក​ដំបូង​សម្រាប់​កម្ពុជា​ដែល​បាន​ចូល​រួម​ប្រកួត​ជើង​ឯក​ពិភពលោក ហើយយើង​បាន​ប្រយុទ្ធ​យ៉ាង​ល្អ ដោយដណ្តើម​បានពិន្ទុខ្លះ​ជាមួយ​នឹង​ម្ចាស់​ជើងឯក​ពិភពលោក។ លោកបន្ដថា វាជាបទពិសោធន៍ដ៏ល្អ ហើយ​តាមរយៈការប្រកួតនេះនឹងជួយអត្តពលិកកម្ពុជា ក្នុងការអភិវឌ្ឍសមត្ថភាពបន្ថែម ឆ្ពោះទៅចូលរួម​ការប្រកួតកីឡាអាស៊ី (Asian Games) លើកទី១៩ នៅទីក្រុង Hangzhou ខេត្ត Zhejiang សាធារណរដ្ឋប្រជាមានិតចិន ពីថ្ងៃទី២៨ ខែកញ្ញា ដល់ថ្ងៃទី០៨ ខែតុលា ឆ្នាំ២០២៣៕