ថ្លែងនៅក្នុងកិច្ចសម្ភាសន៍ជាមួយសារព័ត៌មាន Sky Sports កាលពីពេលថ្មីៗនេះ ខ្សែប្រយុទ្ធ Cristiano Ronaldo បាននិយាយថា រូបគេមិនពេញចិត្តចំពោះស្ថានភាពក៏ដូចជាការខិតខំប្រឹងប្រែងលេងរបស់ Manchester United នាពេលបច្ចុប្បន្ននេះឡើយ។

អតីតសមាជិក Sporting Lisbon, Real Madrid និង Juventus ខាងលើបានបន្ថែមទៀតថា៖ “និយាយចេញពីបេះដូង ខ្ញុំមិនអាចទទួលយកបានទេអំពីស្ថានភាពរបស់យើងនាពេលបច្ចុប្បន្ននេះ យើងត្រូវតែខំប្រឹងជាងនេះ។​ យើងត្រូវតែប្រជែងយក Top3 នៅក្របខ័ណ្ឌ Premier League មិនមែននៅលេខ៦-៧ដូចឥឡូវនេះឡើយ”។

“ខ្ញុំមកទីនេះសារជាថ្មីម្តងទៀតគឺដើម្បីឈ្នះពាន ហើយខ្ញុំគិតថាឥឡូវនេះគ្រូបង្វឹក Ralf Rangnick កំពុងតែដឹកនាំពួកយើងទៅផ្លូវល្អវិញហើយ។ ដូចនេះយើងត្រូវតែខំប្រឹងជាក្រុមដើម្បីជម្នះពេលវេលានេះជាមួយគ្នាឱ្យទាល់តែបាន” នេះគឺជាការបន្ថែមរបស់ម្ចាស់ពានរង្វាន់ Ballon d’Or ៥សម័យ។

គួរឱ្យដឹងថា ក្រុមបិសាចក្រហម Manchester United បច្ចុប្បន្ននេះកំពុងស្ថិតនៅលេខ៧នៃក្របខ័ណ្ឌ Premier League ដោយនៅពីក្រោយក្រុមកំពូលតារាង Manchester City ចំនួន២២ពិន្ទុឯណោះ។