(BC-99)

លោក Karl-Heinz Rummenigge នាយក​ក្លឹប​បាល់​ទាត់​ Bayern Munich បាន​បង្ហាញ​ការ​យល់ឃើញ​ផ្ទាល់​ខ្លួន​ថា Schalke អាចក្លាយជាម្ចាស់ជើងឯកក្របខ័ណ្ឌ Bundesliga តាំង​ពី​ប៉ុន្មានឆ្នាំមុន​មក​ម៉្លេះ​ប្រសិនបើពួកគេមិនលក់​បកីឡាករវ័យក្មេងដែលមានទេពកោសល្យទេ​នោះ​។

មិន​មែន​ទើប​តែ​រដូវកាល ២០១៩-២០២០ ដែល​ Schalke បានទទួល​រងនូវវិបត្តិ​ហិរញ្ញ​វត្ថុ​ ក៏​ប៉ុន្តែ​ប៉ុន្មាន​រដូវ​កាល​ជាប់​គ្នា​មក​ហើយ​ដែល​ក្លឹប​បាល់​ទាត់​មួយ​នេះ​បាន​ប្រឈម​មុខ​ទៅ​និង​ឱនភាព​លំហូរ​សាច់​ប្រាក់។

នៅខាងក្រៅទីលាន Schalke ក៏​រង​ឥទ្ធិភល​មិន​ល្អ​ផងដែរដោយនាយក​ប្រតិបតិ្ត​ Clemens Tonnies បានលាលែងពីតំណែងបន្ទាប់ពីមានការតវ៉ាពីអ្នកគាំទ្រក្លឹប​ខណៈដែលប្រធានទីផ្សារលោក Alexander Jobst បានបញ្ជាក់ថានឹងត្រូវកាត់បន្ថយចំណាយ​សព្វ​បែប​យ៉ាង​ដោយសារតែស្ថានភាពហិរញ្ញវត្ថុដែលក្លឹបកំពុងប្រឈមមុខ។

ប៉ុន្តែបើ​តាម​ការ​លើក​ឡើង​ដោយ​លោក Rummenigge នាយកប្រតិបត្តិរបស់ក្រុមម្ចាស់ជើងឯក Bayern Munich បាន​និយាយ​ថា​ ស្ថានភាពរបស់ Schalke អាចខុសពី​នេះ​​ប្រសិន​បើពួកគេនៅ​តែ​រក្សាតារា​បាល់​ទាត់​ដែលកំពុងកើនប្រជាប្រិយ៍​របស់ពួកគេក្នុងរយៈពេលប៉ុន្មានឆ្នាំនេះ ។

លោក Rummenigge បានប្រាប់ Sport1 ថា៖ “Schalke អាចក្លាយជាម្ចាស់ជើងឯកអាឡឺម៉ង់ក្នុងពេលបច្ចុប្បន្នប្រសិនបើពួកគេអាចរក្សាកីឡាករយុវជនរបស់ពួកគេជាច្រើនដែលក្លឹប​នេះ​​បានបណ្តុះបណ្តាលមក​យ៉ាងល្អ”។

គួរ​បញ្ជាក់​ថា​ក្នុងចំណោមកីឡាករ​ល្អៗ​ដែល Schalke បាន​លក់​ចេញ​ក្នុង​នោះ​ក៏​មានកីឡាករ​ដ៏​ល្អ​របស់ Bayern Munich នា​ពេល​បច្ចុប្បន្ន​ដែរ​ដូច​ជា​អ្នកចាំទី Manuel Neuer, Alexander Nubel និងខ្សែ​បម្រើ​កណ្តាល​ Leon Goretzka ព្រម​ទាំង​បាន​លក់​កីឡាករ​ឆ្នើម​ Leroy Sane អោយ Manchester City ដែល​នៅ​ពេល​អនាគត​នេះ​គេ​ក៏​នឹង​ចូល​រួម​ជា​មួយ Bayern Munich ដែរ​។ ក្រៅ​ពី​នោះ​អតីត​កីឡាករ​ឆ្នើមៗក្នុង​ថ្នាល​​ដែល​ Schalke បាន​លក់​ចេញជា​បន្ត​បន្ទាប់​រួម​មាន Mesut Ozil, Julian Draxler និង Benedikt Howedes ជា​ដើម​។​