គ្រូបង្វឹកនៃក្លិបប្រដាល់កងពលតូចពិសេសឆ័ត្រយោង៩១១លោក ហង្ស សឿន ស្នើសុំស្ថានីយ៍ ទូរទស្សន៍ទាំងអស់ដែលមានសង្វៀនប្រកួតរៀងរាល់សប្តាហ៍ជួយជ្រើសរើសយកកូនសិស្សរបស់ លោកអោយបានប្រកួតផងដែលមាន ព្រំ សំណាង និង អ៊ុង វីរៈ​ ទោះបី១ខែមួយម្តងក៏បានដែរ ។

ហង្ស សឿន

គ្រូបង្វឹកដែលបណ្តុះកីឡាករគុនខ្មែរខ្លាំងៗជាច្រើនរូបនេះបានបង្ហើបថា លោកដឹងថាអ្នករៀបចំកម្មវិធី ប្រដាល់ពិបាករកដៃគូក្នុងការប្រកួតប្រភេទទម្ងន់ធ្ងន់ ប៉ុន្តែលោកជឿថាមិនអត់នោះទេសម្រាប់ កីឡាករបរទេសមិនថាថៃរឺជនជាតិណានោះទេ ។ លោកបន្ថែមថាទាំង ព្រំ សំណាង និង អ៊ុង វីរៈ ចាប់ផ្តើមបាក់ទឹកចិត្តមិនចង់ហ្វឹកហាត់ព្រោះមិនបានប្រកួត ដោយពួកគេនិងលោកផ្ទាល់ចង់បាន ត្រឹម១ខែមួយប្រកួតអីក៏បានដែរ ដើម្បីមានកម្លាំងចិត្តប្រឹងហ្វឹកហាត់ជាបន្តទៀត ។

ព្រំ សំណាង

ចុងក្រោយលោកបញ្ជាក់ថា ព្រំ សំណាង អាចប្រកួតបានចន្លោះពីទម្ងន់ ៧៥ ដល់ ៧៧ ខណៈ អ៊ុង វីរៈ អាចប្រកួតបានចន្លោះពី ៧៧ ដល់ ៨០ គីឡូក្រាម ។

អ៊ុង ភារាក់ និង ភិតបុប្ជា (ថៃ)

សូមបញ្ជាក់ថា ព្រំ សំណាង និង អ៊ុង វីរៈ ជាកីឡាករប្រភេទទម្ងន់ធ្ងន់របស់កម្ពុជាដែលស្ថិតនៅលំដាប់ ជួរមុខ ខណៈបច្ចុប្បន្ននេះពួកគេខកខានប្រកួតអស់រយៈពេលជាយូរដោយសារតែខាងកម្មវិធីប្រដាល់ នានាពិបាករកដៃគូក្នុងប្រភេទទម្ងន់ធ្ងន់បែបនេះ ៕