Pellistri ៖ ការសហការគ្នាជាមួយ Cavani ពិតជាសំខាន់ណាស់សម្រាប់ខ្ញុំ
(BC-99)
ខ្សែបម្រើស្លាបវ័យក្មេងរបស់ក្លឹបបិសាចក្រហម Manchester United Facundo Pellistri បាននិយាយពីអារម្មណ៍ដ៏រីករាយរបស់ខ្លួនដែលបានចូលរួមហ្វឹកជាមួយ Edinson Cavani ។
ក្រោយពីបានហ្វឹកហាត់ជាមួយក្រុមឈុតធំរបស់ក្លិបជាលើកដំបូង Pellistri បាននិយាយពីទឹកចិត្តរំភើបរីករាយរបស់ខ្លួនដែលបានលេងជាមួយតារាលំដាប់ខ្ពស់ដែលក្នុងនោះក៏មានទាំង Cavani ដែលបានជួយឱ្យគេកាន់តែយល់ឃើញថាខ្លួនឯងបានក្លាយជាបុគ្គលម្នាក់ដែលក្លិបកំពុងតែចាប់ចាប់អារម្មណ៍។
Pellistri បានប្រាប់គេហទំព័រផ្លូវការរបស់ United ថា “វាពិតជាអស្ចារ្យណាស់ក្នុងការហ្វឹកហាត់ជាមួយកីឡាករឆ្នើមៗដូចជា Rashford, Pogba, Mata និង Edi ដែលពួកគេមានទំនាក់ទំនងល្អនិងជាមិត្តជិតស្និទ្ធនឹងខ្ញុំ។ ខ្ញុំធ្លាប់តែបានមើលពួកគេលេងតាមកញ្ចក់ទូរទស្សន៍ តែឥឡូវនេះខ្ញុំកំពុងហាត់ជាមួយបុគ្គលខ្លាំងៗទាំងនេះ។ ដោយឡែក Edi តែងតែព្យាយាមនៅក្បែរខ្ញុំនិងផ្តល់ដំបូន្មានគ្រប់យ៉ាងដែលខ្ញុំត្រូវការ។ ជាការពិតណាស់ ពេលនេះខ្ញុំកំពុងតែមានអារម្មណ៍ថាទីនេះគឺជាផ្ទះទី២របស់ខ្ញុំដូច្នោះដែរ” ។
សូមបញ្ជាក់ដែរថា Facundo Pellistri ត្រូវបានក្រុមបិសាចក្រហមទិញពីក្លិប Peñarol ប្រទេស អ៊ូរុយហ្គាយ ក្នុងតម្លៃ១០លានផោននៅដើមរដូវកាលនេះ។ ក៏ប៉ុន្តែកីឡាករវ័យ១៩ឆ្នាំនេះដែរត្រូវបាន Man Utd ដាក់ឱ្យលេងជាមួយក្រុមយុវជនវ័យ២១ឆ្នាំសិនដោយបានស៊ុតបញ្ចូលទីបានមួយគ្រាប់ក្នុងចំណោមការបង្ហាញខ្លួនទាំង២លើក។ ការហ្វឹកហាត់ជាមួយឈុតធំក៏ជាក្តីសង្ឃឹមរបស់គេក្នុងការបង្ហាញសមត្ថភាពនៅ Premier League នាពេលដ៏ខ្លីខាងមុខនេះដែរ។
