ការឡើងទៅកាន់ក្របខណ្ឌកំពូលអង់គ្លេសរបស់ Fulham ផ្តល់ឱកាសដល់យុវជន Benjamin James Davis ក្លាយជាកីឡាករថៃដំបូងគេលេងនៅ Premier League។

ទោះជាសមាជិកក្រុមយុវជន U23 មែន ប៉ុន្តែ Benjamin ទើបបន្តកុងត្រា២ឆ្នាំទៀតជាមួយ Fulham ដូច្នេះថៃមានសង្ឃឹមថា គេនឹងមានឱកាសបង្ហាញខ្លួននៅ Premier League នាពេលខាងមុខ។

Benjamin Davies បានចូលរួមជាមួយ Fulham ក្នុងឆ្នាំ ២០១៧ និងលេងបាន១២ដងក្នុងក្រុមយុវជននៅរដូវកាល ២០១៩/២០ ។

ថៃមិនដែលមានកីឡាករលេងនៅ Premier League ទេ ទោះ Teerasil Dangda, Suree Sukha និង Kiatprawut Saiwaeo ធ្លាប់ហ្វឹកហាត់នៅ Manchesgter City។ អ្នកទាំង៣សុទ្ធតែទទួលបានកុងត្រានៅក្រុមមេឃខៀវកាលឆ្នាំ២០០៧/២០០៨ អំឡុងអតីតនាយករដ្ឋមន្ត្រីថៃ Thaksin Shinawatra ជាម្ចាស់ក្លិប តែមិនដែលចូលលេងឡើយ។

Benjamin Davies កើតនៅឆ្នាំ២០០០ ដោយមានឪពុកជាជនជាតិអង់គ្លេស និងម្តាយជនជាតិថៃ តែធំដឹងក្តីនៅសិង្ហបុរី។ គេមានសញ្ជាតិនៃប្រទេសទាំងបីតែម្ដង។ កាលពីមុន យុវជន៣សញ្ជាតិរូបនេះធ្លាប់លេង ក្រុមជម្រើសជាតិសិង្ហបុរី U16 មុនពេលចូលរួមជាមួយក្រុម Fulham ក្នុងឆ្នាំ ២០១៧។ ចាប់ពីដើមឆ្នាំ២០២០នេះ គេលេងឲ្យជម្រើសជាតិថៃអាយុក្រោម២៣ឆ្នាំ៕