ឃុន ឌីម៉ា

បន្ទាប់ពីមានអ្នកគាំទ្រជាច្រើនចង់ឃើញការប្រកួតនិងសម្តែងការនឹករលឹកខ្លាំង ឃុន ឌីម៉ា បានបង្ហាញអារម្មណ៍ពិតរបស់ខ្លួនថាខ្ញុំពិតជាចង់ឡើងសង្វៀននិងនឹកដល់អ្នកគាំទ្រគុនខ្មែរយ៉ាងខ្លាំង បន្ទាប់ពីបានសម្រាកព្យាបាលរបួសជើងដែលបានវះកាត់ព្យាបាលរបួសសរសៃអស់រយៈពេល១ឆ្នាំមកហើយ ប៉ុន្តែស្ថានភាពនូវតែមិនអាចកំណត់ថ្ងៃវិលចូលសង្វៀនបាន ។

ម្ចាស់ខ្សែក្រវាត់៤គ្រឿង បានបញ្ជាក់ថា ខ្ញុំក៏ចង់ឡើងសង្វៀនវិញដែរ ប៉ុន្តែស្ថានភាពពេលនេះមិនអាចប្រកួតនោះទេ ពីព្រោះការហ្វឹកហាត់មិនទាន់បានពេញ១០០ភាគរយនោះឡើយ ដោយសារការរំខានពីរបួសជើងនៅតែបន្ត បើពេលវេលាណាមួយខ្ញុំអាចហាត់បានពេញ១០០ភាគរយ ខ្ញុំនឹងឡើងសង្វៀនវិញ ពីព្រោះពេលឃើញគេប្រកួតចិត្តរបស់ខ្ញុំនៅតែចង់ ហើយប្រសិនរបួសមិនទាន់ជា១០០ហើយហាត់មិនពេញខ្ញុំមិនឡើងប្រកួតនោះទេ ពីព្រោះខ្លាចចាញ់រឺប្រកួតមិនល្អនាំអោយអ្នកគាំទ្រគាត់ខកចិត្ត ព្រោះធ្លាប់ជាកីឡាករល្អម្នាក់ដែរ ។

របួសរបស់ម្ចាស់មេដាយមានស៊ីហ្គេមឆ្នាំ ២០១៧ បានធូរស្រាលច្រើនហើយ ប៉ុន្តែអ្វីដែលពិបាកនោះគឺមិនទាន់អាចហាត់បានពេញ១០០ភាគរយ ដោយបច្ចុប្បន្នរូបគេព្យាយាមហាត់បានខ្លះៗតាមស្ថានភាពដែលបានធូរស្រាលតែប៉ុណ្ណោះ ទើបមិនទាន់ដឹងច្បាស់ថាពេលណាអាចវិលមកសង្វៀនវិញបាន ។

សូមបញ្ជាក់ថា ឃីម ឌី​ម៉ា បាន​រងរបួសសរសៃជង្គង់ខាង​ស្តាំ​យ៉ាងធ្ងន់ធ្ងរដែលបានវះកាត់នៅប្រទេសថៃកាលពីខែកក្កដា ឆ្នាំ២០១៩ កន្លងទៅ ហើយការរងរបួសនេះធ្វើអោយគេត្រូវ​អវត្តមាន​ក្នុងការ​ប្រកួត​កីឡា​ស៊ី​ហ្គេម​លើក​ទី​៣០​នៅ​ប្រទេស​ហ្វីល​ពី​ន​ឆ្នាំ២០១៩ និង​បោះបង់​ការប្រកួត​ដណ្តើម​ខ្សែក្រវាត់​ ISI PALM ​នៅតាម​ស្ថានីយទូរទស្សន៍​ PNN ផងដែរ ៕