ដើម្បីអោយអស់ចិត្តទាំងខ្លួនឯងនិងអ្នកគាំទ្រ ដៃភ្លើងជើងរន្ទះ រឿង សោភ័ណ្ឌ បានប្រកាសចង់ជួបជាមួយដៃគូចាស់របស់ខ្លួនចំនួនពីរនាក់ដែលរូបគេធ្លាប់ឈ្នះនិងធ្លាប់ចាញ់ក្នុងការប្រកួតកន្លងមក ក្នុងនោះមានអ្នកប្រដាល់ថៃ គួន អ៊ូ និងកីឡាករ កងថៃឡេន ។

រឿង សោភ័ណ្ឌ បានបញ្ជាក់ថា ដើម្បីអោយអស់ចិត្តរូបគេចង់សាកល្បងថ្វីដៃជាមួយកីឡាករថៃ គួន អ៊ូ ម្តងទៀត ខណៈកីឡាករថៃ កងថៃឡេន ដែលរូបគេធ្លាប់ឈ្នះពិន្ទុ ក៏រូបគេចង់ប៉ះម្តងទៀតដែរ ពីព្រោះកីឡាករថៃហាក់បីមិនទាន់អស់ចិត្ត ហើយមានអ្នកគាំទ្រ ជាច្រើនចង់អោយជួបគ្នាសារជាថ្មី ។

គួររំលឹកថា រឿង សោភ័ណ្ឌ ធ្លាប់ចាញ់ពិន្ទុកីឡាករថៃ គួន អ៊ូ ម្តងរួចមកហើយក្នុងការប្រកួតនៅសង្វៀន Muay Thai Super Champ ដែលរៀបចំឡើងនៅទឹកដីប្រទេសថៃ ក្នុងឆ្នាំ ២០១៩ ខណៈ កងថៃឡេន វិញ រឿង សោភ័ណ្ឌ ធ្លាប់ឈ្នះ ទាំងប្រផុតប្រផើយ ក្នុងការប្រកួតអ្នកតស៊ូគុនខ្មែរគោជល់ជើងឯកប៉ះគ្នា ដែលគា្រនោះ រឿង សោភ័ណ្ឌ បានត្រឹមជើងឯករងក្រោយពីចាញ់ នី សុភី ក្នុងវគ្គផ្តាច់ព្រ័ត្រ ៕