១៤២លានផោនដែលអ្នកមានបុណ្យ Barcelona ហ៊ានចំណាយក្នុងការទិញ Phillipe Coutinho ពីហង្សក្រហម Liverpool កាលពីដើមឆ្នាំ ២០០៨ គឺជាខ្ទង់ចំណាយមួយដ៏ធំ ប៉ុន្តែវាមិនបានធ្វើអោយខ្សែប្រយុទ្ធជនជាតិប្រេស៊ីលរូបនេះក្លាយជា Super Star លើទីលានបាល់ទាត់ក្នុងទឹកដីប្រទេសអេស្ប៉ាញនោះទេ។

ការលេងអោយក្រុមដែលមានមូលដ្ឋាននៅ Catalan មួយនេះ កីឡាករវ័យ ២៧ឆ្នាំ មិនសូវជាប់ជាជំរើស១១នាក់នោះទេ ដែលជាហេតុធ្វើអោយមានការអាក់អន់ចិត្តនិងគ្នា។ ណាមួយបច្ចុប្បន្ន Barcelona ក៏ទើបតែទទួលបានសមាជិកថ្មី Antoine Griezmann ក្នុងជួរប្រយុទ្ធថែមទៀត វាកាន់តែធ្វើអោយ Coutniho អាចនិងក្លាយជាតួររងនៅរដូវកាលថ្មីដែលនិងចាប់ផ្តើមក្នុងពេលឆាប់ៗ។

មួយរយៈនេះ មានព័តមានដោះដូរជាច្រើនកើតមានចំពោះ Coutinho ដូចជាការផ្លាស់ទៅកាន់មាន់ខ្នាយមាស Spur កាំភ្លើងធំ Arsenal និងបិសាចក្រហម Manchester United ជាដើម ប៉ុន្តែក៏បរាជ័យទៅវិញ។ ឥឡូវនេះក្លឹបយក្សនៅអាល្លឺម៉ង់ Bayern Munich ក៏ចូលមកប្រជែងយក Coutinho ផងដែរ ប៉ុន្តែក្នុងលក្ខ័ណខ្ជីជើងមួយរដូវកាល។

Bayern Munich និងទទួលបាន Coutinho ដោយមិនមែនការចំណាយលើតំលៃខ្លួនទៅអោយ Barcelona នោះទេ ប៉ុន្តែចំណាយទៅលើតំលៃពលកម្មមួយរដូវកាល ១១លានផោនអោយទៅ Coutinho ហើយពួកគេនិងទទួលបានកុងត្រាទិញផ្តាច់នៅពេលបញ្ចប់រដូវកាលផងដែរ។ បច្ចុប្បន្ន Bayern Munich កំពុងចរចារផ្ទាល់ជាមួយសមីខ្លួនកីឡាករដើម្បីសំរេចកិច្ចការធំមួយនេះ ព្រោះពួកគេចង់បានកីឡាករប្រេស៊ីលម្នាកនេះខ្លាំងណាស់។

រាប់ចាប់តាំងពីផ្លាស់មក Barcelona កាលពីខែមករាឆ្នាំ ២០១៨មក Coutinho ចូលលេងបាន ៧៥ប្រកួត និងស៊ុតបញ្ចូលទីបាន ២១គ្រាប់ ដែលរួមចំណែកលើកពាន La Liga ២ដង និង Copa del Rey ១ដងផងដែរ៕