តារាបាល់ទាត់ក្លឹប LA Galaxy កីឡាករស៊ុយអែត Zlatan Ibrahimovic បាន​ប្រាប់​ឲ្យ​អ្នក​គាំទ្របីសាចក្រហម Manchester United ឲ្យ​ត្រៀម​ខ្លួន ព្រោះ​ថា Jose Mourinho ប្រហែលជា​មាន​សារមួយ ដែល​ធ្វើ​ឲ្យ​មានកា​រភ្ញាក់ផ្អើល​ទាក់ទងនឹងរូបគេ។

នៅពេល Mourinho នាំ Man Utd ទៅប្រកួត​សមជើងក្របខណ្ឌ International Champions Cup នៅសហរដ្ឋអាមេរិក Zlatan បាន​ឆ្លៀត​ពេល​ទៅជួប​គ្រូបង្វឹក​សញ្ជាតិ​ព័រទុយហ្កាល់ នៅ​ជំរុំ​ហ្វឹកហាត់ UCLA។ ហើយ​បន្ទាប់​មក កីឡាករវ័យ ៣៦ឆ្នាំ បាន​ចូលទៅ comment ក្នុងទំព័រ Instagram របស់​ក្លឹប Man Utdថា​៖ «ត្រៀម​ខ្លួន​សម្រាប់​រដូវកាលនេះទៅ ព្រោះ​នឹង​មាន​អ្វីដែល​ពិសេសកើតឡើង។ លោក​ចៅហ្វាយ (Jose Mourinho) កំពុង​តែធ្វើ​អ្វីម្យ៉ាង តែយើង​រក្សាការ​សម្ងាត់​ហ្នឹងសិន ហើយ​ចាំរីករាយ។ រីករាយ​ក្នុង​រដូវកាលថ្មី ខ្ញុំជូនពរអ្នក​ទាំងអស់គ្នា បាន​ជួបតែសេចក្តីសុខ»។

Zlatan Ibrahimovic បាន​ផ្លាស់ពីក្លឹប Paris Saint-Germain ទៅកាន់ Man Utd កាលពីឆ្នាំ ២០១៦ និង​​ត្រូវបាន​ផ្លាស់​ទៅកាន់​ក្លឹប LA Galaxy នៅ​សហរដ្ឋអាមេរិក កាលពីឆ្នាំនេះ បន្ទាប់ពី​របួស​ធ្ងន់​នៅក្លឹប Man Utd។

គួរជម្រាបជូនថា ក្នុង​រដូវកាលនេះ Jose Mourinho មាន​ប្រាក់​ក្នុងដៃ ១៥០លានផោន ដើម្បីទិញដូរកីឡាករ។ គាត់​ ​ទើបតែបាន​ចំណាយ​អស់ ៨០លានផោន ដើម្បី​ចុះហត្ថលេខានាំកីឡាករ ៣នាក់​មក Man Utd ដែល​រួមមាន Diogo Dalot, Fred និង​ Lee Grant។ ប៉ុន្តែគាត់ច​ង់បាន ២នាក់​បន្ថែមទៀត មុន​ទីផ្សារដោះដូរកីឡាករ ត្រូវបិទនៅពេលប្រមាណ ៣សប្តាហ៍ទៀត។ គោលដៅ​បន្ទាប់​របស់គាត់ គឺកីឡាករ​របស់ Leicester វ័យ ២៥ឆ្នាំ Harry Maguire តែម្នាក់ទៀតគេនៅមិនទាន់​ដឹងនោះទេ៕