បន្ទាប់ពី​បញ្ចប់ការប្រកួត​រវាងក្រុម​បាល់ទាត់ Sriwijaya FC និង Arema FC កាលពី​រសៀល​ថ្ងៃសៅរ៍ម្សិលមិញ ក្រុម​អ្នក​គាំទ្រ​ដែលទៅទស្សនាការប្រកួត​ក្នុងកីឡដ្ឋាន Gelora Sriwijaya ក្នុងទីក្រុង Palembang លើកោះស៊ូម៉ាត្រា បាន​ចាប់​ផ្តើម​ខឹងកម្រោល​ ហើយបង្កចលាចល និង​​នាំគ្នា​បំផ្លិត​បំផ្លាញ កៅអីអង្គុយ និង​សម្ភារៈក្នុងកីឡដ្ឋាននេះ។ ពួកគេ​ ថែម​ទាំងបាន​បោះកៅអី ចូលទៅក្នុងតារាងទាត់បាល់ទៀតផង។

ប្រធានសន្តិសុខក្នុងកីឡដ្ឋាន បញ្ជាក់ថា មាន​កៅអីចំនួន ៣៣៥ ត្រូវបាន​បំផ្លាញ​ឲ្យ​ខូចខាតខ្ទេចទាំងស្រុង​ ហើយ​នៅមានកៅអីជាច្រើន​ទៀត ប្រហែលជាត្រូវតែធ្វើការ​ផ្លាស់ប្តូរជាបន្ទាន់ មុន​ព្រឹត្តិការណ៍ Asian Games ឈានមកដល់។ ប៉ូលីស បាន​ចាប់ខ្លួន មនុស្ស ៤នាក់ ទាក់ទងនឹងកុប្បកម្មនេះ។ ហើយ​ចំពោះមូលហេតុ ត្រូវបាន​ប៉ូលីសឲ្យ​ដឹងថា ដោយ​សារ​អ្នក​គាំទ្រក្រុមបាល់ទាត់ Sriwijaya FC មិន​សុខចិត្ត​ពេលក្រុម​ខ្លួ​ន​ប្រកួត​ចាញ់​ក្រុម Arema FC ក្នុងទឹកដី ដោយ​លទ្ធផល​ ៣ទល់នឹង០។  យ៉ាងណាក៏ដោយ មិនមាន​នរណាម្នាក់រងរបួស​ក្នុងហេតុការណ៍នេះទេ។

គួរជម្រាបជូនថា កីឡដ្ឋាន Gelora Sriwijayaនេះ ជាកីឡដ្ឋានមួយ ក្នុងទីក្រុង Palembang ដែល​ត្រូវ​ទទួល​រៀបចំព្រឹត្តិការណ៍កីឡាអាស៊ីហ្គេម ពីថ្ងៃទី ១៨សីហា ដល់​ថ្ងៃទី ២ខែកញ្ញា ឆ្នាំ ២០១៨ បន្ទាប់ពី​កីឡដ្ឋាន​ក្នុងរដ្ឋធានី Jakarta។ ព្រឹត្តិការណ៍ Asian Games ជាកម្មវិធីកីឡាដ៏ធំបំផុត​មួយ ក្នុងតំបន់​អាស៊ី ដែល​មាន​ការ​ចូលរួម​ពីអត្តពលិក​ក្នុងតំបន់ប្រមាណ ១១,០០០នាក់ អម​ដោយ​ប្រតិភូ​កីឡាប្រមាណ ៥,០០០នាក់។ នេះជាព្រឹត្តិការណ៍កីឡា​ធំលំដាប់ទី ២ បន្ទាប់​ពី​ព្រឹត្តិការណ៍កីឡាអូឡាំពិក៕