
Neymar នឹងត្រូវឡើងតុលាការរឿងគេចពន្ធពេលផ្លាស់ពីក្លិប Santos ទៅកាន់ក្លិប Barcelona
ខ្សែប្រយុទ្ធ Neymar នឹងត្រូវឡើងតុលាការនៅថ្ងៃទី១៧ ខែតុលា ឆ្នាំ២០២២ខាងមុខ នៅទីក្រុង Barcelona ប្រទេសអេស្ប៉ាញ ដើម្បីតតាំងក្ដីទាក់ទងនឹងរឿងគេចពន្ធនៅពេលផ្លាស់ពីក្លឹប Santos ទៅកាន់ក្លឹប Barcelona កាលពីឆ្នាំ២០១៣។
រឿងរ៉ាវបានកើតឡើងជាច្រើនឆ្នាំមកហើយដោយអាជ្ញាធរពន្ធដារអេស្ប៉ាញ បានធ្វើតាមបណ្ដឹងក្រុមហ៊ុន DIS ដែលជាអ្នករក្សាសិទ្ធ៤០ភាគរយលើការផ្ទេរ Neymar ។ ក្រុមហ៊ុនបានចោទប្រកាន់កីឡាករថា បានបន្លំថ្លៃដោះដូរធ្វើឲ្យទីផ្សារកីឡាករមានភាពមិនប្រក្រតី។
កីឡាករប្រេស៊ីល ត្រូវបានដឹងថាបានគេចពន្ធក្នុងទំហំទឹកប្រាក់ប្រមាណ៨.៤លានដុល្លារ ដែលអាចឲ្យអាជ្ញាធរពន្ធដារអាចនឹងដាក់ទោសក្នុងពន្ធនាគារ២ឆ្នាំនិងពិន័យទឹកប្រាក់១០លានដុល្លារ។ យ៉ាងណា ក្រុមហ៊ុន DIS បានសុំឲ្យដាក់ទោស Neymar រហូតដល់៥ឆ្នាំ និងទាសងជំងឺចិត្តរហូតទៅដល់ ១៥០លានដុល្លារ។
Neymar នឹងត្រូវឡើងតុលាការតតាំងរឿងក្ដីមុនមួយខែនៃព្រឹត្តិការណ៍ FIFA World Cup 2022 ចាប់ផ្ដើម ដោយការប្រកួតនឹងចាប់ផ្ដើមពីថ្ងៃទី២១ ខែវិច្ឆិកា ដល់ថ្ងៃទី១៨ ខែធ្នូ ឆ្នាំ២០២២ខាងមុខ នៅប្រទេសកាតា៕
– F11 –