អ្នកគាំទ្រអង្គុយមិនជាប់នឹងកៅអី ខណៈលទ្ធផលមានឈ្នះ-ចាញ់ដោយពិន្ទុ ក្នុងព្រឹត្តិការណ៍ប្រដាល់ គុនខ្មែរជើងឯកពិភពលោក ដែលនាំមកជូនដោយ គោជល់
ការប្រកួតដ៏ជក់ចិត្តក្នុងព្រឹត្តិការណ៍ប្រដាល់គុនខ្មែរជើងឯកពិភពលោកទាំង ៥ គូបានធ្វើឱ្យសង្វៀនទាំងមូលកក្រើកដោយសំឡេងហ៊ោរកញ្ជ្រៀវ និងស្នូរទះដៃរបស់អ្ន្កគាំទ្រ។
មិនខុសពីព្រឹត្តិការណ៍ទី ១ ការប្រកួតទាំង ៥ គូកាលពីថ្ងៃទី ២៧ ខែកក្កដា ឆ្នាំ ២០២២ ម្សិលមិញនេះ សុទ្ធតែធ្វើឱ្យអ្នកគាំទ្រអង្គុយនឹងកៅអីលែងជាប់ ខណៈ យ៉េន ឌីណា បានផ្តួលគូប្រកួតជនជាតិឥណ្ឌាឱ្យអាជ្ញាកណ្តាលបញ្ឈប់ក្នុងទឹកទី ៣។ ដោយឡែក ការប្រកួតរវាងកីឡាករគុនខ្មែរ ឈឿន ល្វៃ និងកីឡាករអង់គ្លេសបានអង្រួនសង្វៀនបីទឹកពេញតែម្តង។ ជាលទ្ធផល ឈឿន ល្វៃ បានយកឈ្នះការប្រកួតប្រកបដោយភាពមុះមុតអង់អាច ដោយវាយសន្ធប់លើកីឡាករអង់គ្លេសយ៉ាងខ្លាំង។
លទ្ធផលបីគូផ្សេងទៀតរួមមាន៖
- កីឡាករ ឃីម បូរ៉ា យកឈ្នះកីឡាករថៃ ហឺរីខែន ដោយពិន្ទុ
- កីឡាករ អេអមរិន ភូថង យកឈ្នះកីឡាករអ៊ីរ៉ង់ មហាមេដ អេសមេអ៊ីល ដោយពិន្ទុ
- កីឡាការិនី ទូន ស្រីពីន ចាញ់កីឡាការិនីប្រេស៊ីល ប្រាបារ៉ា ដោយអាជ្ញាកណ្តាលបញ្ឈប់ការប្រកួតក្នុងទឹកទី៣
ជាកំណត់សម្គាល់តាមរយៈការបង្ហាញអារម្មណ៍របស់ទស្សនិកជន ឃើញថាកំពូលព្រឹត្តិការណ៍ប្រដាល់ គុនខ្មែរជើងឯកពិភពលោក នាំមកជូនដោយ គោជល់ ដែលបានធ្វើឡើងពីរលើករួចមកហើយនេះ ការប្រកួតនីមួយៗសុទ្ធតែជ្រើសរើសកីឡាករលំដាប់ប្រទេសពីជុំវិញពិភពលោក មកធ្វើការប្រកួតយ៉ាងអស់ពីសមត្ថភាព ដែលធ្វើឱ្យគ្រប់ការប្រកួតទាំងមិត្តភាព និងដណ្តើមខ្សែក្រវាត់មានការតស៊ូយ៉ាងស្វិតស្វាញមិនចាញ់ការប្រកួតវគ្គផ្តាច់ព្រ័ត្រឡើយ។
សូមបញ្ជាក់ផងដែរថាព្រឹត្តិការណ៍ប្រកួតលើកទី៣ នឹងធ្វើឡើងនៅថ្ងៃទី ១០ ខែសីហា ឆ្នាំ ២០២២ នៅពហុកីឡដ្ឋានជាតិមរតកតេជោ ផ្សាយផ្ទាល់តាមរយៈកញ្ចក់ទូរទស្សន៍ប៉ុស្តិ៍បាយ័ន និងហ្វេសប៊ុក Red Bull Cambodia ចាប់ពីម៉ោង ៥ ល្ងាចតទៅដដែល។
