ការប្រកួតអ្នកតស៊ូគុនខ្មែរគោជល់កំពូលជើងឯករដូវកាលទី២ ជុំទី២ ក្នុងពូល B  ឡុង សំណាង ឈ្នះកីឡាករ ភុំ សារ៉ាយ ស្រួលៗ ខណៈ សូត្រ ខេវិន ឈ្នះ សេក គឹមរួន នាសង្វៀន CNC កាលពីថ្ងៃ សៅរ៍ ។

បន្ទាប់ពីឈ្នះកីឡាករ សូត្រ ខេវិន ក្នុងការប្រកួតជុំទី១ អ្នកប្រដាល់នៃក្លិប សាលវ័ន្តកីឡា បន្តឈ្នះជាលើកទី២ ដោយលើកទី២នេះកូនសិស្សរបស់លោក ឡុង សាលវ័ន្ត មិនចំណាយ កម្លាំងច្រើននោះទេ បន្ទាប់ពីប្រើកណ្តាប់ដៃវាយ ភុំ សារ៉ាយ អោយបោះបង់ការប្រកួតទឹកទី១  ។ ក្នុងថ្ងៃជាមួយគ្នានោះដែរគូខ្សែក្រវាត់មួយគូទៀត សូត្រ ខេវិន បានយកឈ្នះពិន្ទុប្រផិតប្រផើយលើកីឡាករ សេក គឹមរួន បន្ទាប់ពីប្រកួតជាមួយគ្នាពេញ៥ទឹក ។

សរុបក្នុងពូល B នេះក្រោយឆ្លងកាត់ការប្រកួត២ប្រកួតកន្លងមក ឡុង សំណាង នៅលេខ១ មាន ៦ពិន្ទុ , សូត្រ ខេវិន មាន ៤ ពិន្ទុ , សេក គឹមរួន មាន៤ពិន្ទុ និង ភុំ សារ៉ាយ មាន២ ពិន្ទុ ។ ថ្ងៃ សៅរ៍ សប្តាហ៍នេះឈានដល់ការប្រកួតជម្រុះក្នុងពូល A ជុំចុងក្រោយ វិញម្តង ដោយកីឡាករ វេន សុភ័ក្រ ប៉ះ ធី វ៉ារិទ្ធ និង សូដា កូម៉ាន់ ប្រកួតជាមួយ សុខ សុវណ្ណ ចាប់ពីម៉ោង ៦ ល្ងាច ផ្សាយផ្ទាល់តាមទូរទស្សន៍ CNC ៕