លោក Stefan Fogorosi បានសម្រេចលាឈប់ពីតំណែងគ្រូបង្គោលក្លិប Galda de Jos ភ្លាមៗ បន្ទាប់ពីក្លិបនេះបង្ហោះព័ត៌មានបែបលេងសើចចំទិវាកុហកខែ​មេសា ឬ April Fool’s Day។

យោងតាមវិបសាយ Sports.ro ឲ្យដឹងថា ក្លិបនៅលីគទី៣រ៉ូម៉ានីមួយនេះសរសេរថា លោក Stefan Fogorosi ត្រូវបានបណ្ដេញចេញពីតំណែងនៅថ្ងៃ April Fool’s Day។

ពួកគេសរសេរបែបនេះ “៖សូមអរគុណដល់លោកគ្រូ Fogorsi ចំពោះការទទួល​យកការប្រកួតប្រជែងនេះ។ យើងយល់ពីសមត្ថភាពដែលឈានទៅកម្រិតសេរ៉ូតែម្ដង ពេលដែលមិនឈ្នះសោះ៣ប្រកួតចុងក្រោយ។ អ្វីដែលជាជម្រើសល្អនោះ គឺមានតែចែកផ្លូវគ្នានេះឯង។ ឥឡូវគ្រូបង្វឹក គឺជាម្ចាស់ក្លិប និងកូនគាត់។”

ការលេងសើចបែបនេះក៏បានក្លាយជាការពិតនៅពេលលោក Fogorosi បានដឹងពីរឿង ហើយខឹងមែនទែនតែម្ដង។ គ្រូបង្វឹករូបនេះមិនបានចូលរួមការហ្វឹកហាត់ ហើយក៏មិនលេចមុខពេលប្រកួតនៅថ្ងៃសុក្រ ទី០២ ខែមេសា ដែរ។

យ៉ាងណាលទ្ធផល៣ប្រកួតកន្លងមកជាក់ស្ដែងក្រោមការដឹកនាំរបស់លោក Fogorosi គឺមិនដែលឈ្នះមែន។

គួរដឹងដែរថា April Fool’s Day ជាវប្បធម៌ពីលោកខាងលិចដែលគេចូលចិត្តធ្វើរឿងកុហកលក្ខណៈលេងសើចរៀងរាល់ថ្ងៃទី០១​ ខែមេសា៕