(BC-99)

Edinson Cavani សង្ឃឹមថានឹងអាច​បង្ហាញវត្តមានអោយក្រុមបិសាចក្រហម Manchester United នៅ Old Trafford ចុងសប្តាហ៍នេះដោយ​ត្រូវ​ប៉ះ​ធ្វើ​ជាគូ​ប្រជែង​ជាមួយអតីត​មិត្តរួម​ក្រុម PSG-Thiago Silva ដែល​ជា​សមាជិក​ក្រុមតោខៀវ Chelsea នាពេល​បច្ចុប្បន្ន។

នា​ចុង​សប្តាហ៍​នេះ​ក្រុម​របស់​លោក Frank Lampard តោខៀវ Chelsea នឹង​ត្រូវ​ធ្វើ​ដំណើរ​ទៅ​កាន់ទីក្រុង Manchester ដើម្បី​ប្រកួត​ជាមួយ​ក្រុម United ដែល​រំពឹង​ថា​កីឡាករ​ខ្សែ​ប្រយុទ្ធ​ចំណូល​ថ្មី​និង​ជា​ម្ចាស់​អាវ​លេខ៧ Cavani ក៏​នឹង​អាចបង្ហាញខ្លួនលើកដំបូងនៅពេល​នោះ​ដែរ​។

និយាយ​អំពី​គុណ​សម្បត្តិ​របស់​អតីត​ខ្សែការពារ PSG Cavani បានប្រាប់ EN24 News ថា៖ “វាពិតជាអស្ចារ្យណាស់ដែលអាចជួប​គេ​ជា​ថ្មី​នៅលើទីលាន។ Thiago គឺជា​រនាំង​ការពារ​ដែល​មានជំនាញខ្ពស់ម្នាក់ គេតែងតែ​​ធ្វើការហ្វឹកហាត់និងការកម្តៅសាច់ដុំយ៉ាង​ខ្លាង​ក្លា​មុនការប្រកួត។ វានឹងស្មុគស្មាញសម្រាប់​ខ្ញុំ​និង​មិត្ត​រួម​ក្រុម United ផ្សេងទៀត​ព្រោះគេ​ជាខ្សែការពារកណ្តាលដ៏ល្អនិងជាកីឡាករបាល់ទាត់ដ៏​ឆ្នើម។ វានឹង​ក្លាយ​ជាបទពិសោធដ៏អស្ចារ្យមួយដែល​យើង​នឹង​ប្រជែង​គ្នា​នៅ Premier League”។

សូម​ជម្រាប​ដែរ​ថា​ជំនួប​គ្នា​រវាង Man Utd និង Chelsea នា​វេលាម៉ោង ២៣:០០ នារាត្រី​ថ្ងៃ​សៅរ៍​ទី ២៤ តុលានេះ​ក៏​នឹង​មាន​ការ​ផ្សាយ​បន្តផ្ទាល់​តាម​រយៈ​ក្រុមហ៊ុន​ទូរទស្សន៍ CBS ផង​ដែរ​។​