ខ្សែប្រយុទ្ធ Braithwaite បដិសេធរឿងស្នើសុំពាក់អាវលេខ១០នៅ Barcelona បន្តពី Lionel Messi
កាលពីម្សិលមិញ ខ្សែប្រយុទ្ធ Martin Braithwaite ត្រូវគេរាយការណ៍មកថា បានស្នើសុំពាក់អាវលេខ១០ បើសិន Lionel Messi ពិតជាចាកចេញពី FC Barcelona មែននៅរដូវក្តៅនេះមែន។
យ៉ាងណាក្តី កីឡាករសញ្ជាតិដាណាម៉ាករូបនេះបានចេញមុខមកបដិសេធលើសារព័ត៌មានទាំងអស់ដោយបាននិយាយថា គេមិនបានគិតថានឹងធ្វើបែបនេះ ហើយវាជារឿងដែលមិនគោរពដល់គេ ក៏ដូចជា Lionel Messi ជាដើម។
គួរឱ្យដឹងដា ប៉ុន្មានថ្ងៃមកនេះ ម្ចាស់ពានរង្វាន់ Ballon d’Or ៦សម័យបានធ្វើឱ្យពិភពបាល់ទាត់ភ្ញាក់ផ្អើលយ៉ាងខ្លាំង ក្រោយពីរូបគេបានសុំចាកចេញពី FC Barcelona ក្រោមហេតុផលមិនសប្បាយចិត្តជាមួយនឹងក្លឹប ក៏ដូចជារចនាសម្ព័ន្ធក្នុងការដឹកនាំរបស់ក្លឹបផងដែរ។
ឥឡូវនេះ FC Barcelona កំពុងតែព្យាយាមធ្វើការចរចារជាមួយប្រធានក្រុមជម្រើសជាតិអាហ្សង់ទីនដើម្បីឱ្យរូបគេនៅទឹកដី Camp Nou ជាបន្តទៀត បើទោះបីជាគេមិនព្រមបង្ហាញខ្លួននៅទីលានហ្វឹកហាត់យ៉ាងណាក្តី។
គួរឱ្យដឹងថា Martin Braithwaite បានផ្លាស់ពី Leganes មកកាន់ Barcelona នៅដើមខែមករានេះក្នុងតម្លៃខ្លួន១៨លានអឺរ៉ូ ដោយរូបគេបានបង្ហាញខ្លួនបាន១១លើកហើយស៊ុតបញ្ចូលទីបាន១គ្រាប់ផងដែរ។