ក្រុមបាល់ទាត់ភ្នំពេញក្រោន បានចែកពិន្ទុគ្នាជាមួយ ណាហ្គាវើលដ៍ ក្នុងលទ្ធផល ១ ទល់ ១ មុននេះបន្តិច នាកីឡដ្ឋានស្តាតចាស់ នៃពានរង្វាន់ក្របខណ្ឌបាល់ទាត់លីគកំពូលកម្ពុជា រដូវកាល២០២០ សប្តាហ៍ទី៧ ធ្វើឱ្យក្រុមជើងឯក ៦ សម័យកាលបន្តមិនស្គាល់បរាជ័យ បើទោះបីអវត្តមានខ្សែប្រយុទ្ធឆ្នើម Paulo Victor ក៏ដោយ។

ក្នុងជំនួបដ៏ធំនេះ ក្រុមភ្ញៀវ ភ្នំពេញក្រោន បានធ្វើការនាំមុខមុន ដោយប្រើត្រឹមរយៈពេល ១នាទី បន្ទាប់ពីលោកអជ្ញាកណ្តាលផ្លុំកញ្ចែរចាប់ផ្តើម ស្របពេលដែលគ្រាប់បាល់នេះធ្វើបានសម្រេចដោយខ្សែប្រយុទ្ធមាឌធំ Timothy។ យ៉ាងណាក៏ដោយ ក្រុមម្ចាស់ផ្ទះ ណាហ្គាវើលដ៍ បានព្យាយាមសម្រុកយ៉ាងខ្លាំង រហូតអាចរកគ្រាប់បាល់តាមស្មើមកវិញ ពីសំណាក់កីឡាករ Oliveira នៅនាទីទី៨០’ ខណៈលទ្ធផលនេះ រក្សាដល់ចប់ការប្រកួត។

សួមបញ្ជាក់ផងដែរថា ការប្រកួតពានរង្វាន់ក្របខណ្ឌបាល់ទាត់លីគកំពូលកម្ពុជា រដូវកាល២០២០ សប្តាហ៍ទី៧ នាថ្ងៃនេះ នៅមានពីរគូផ្សេងទៀត ដោយក្រុម បឹងកេត បានយកឈ្នះម្ចាស់ផ្ទះ គិរីវង់សុខសែនជ័យ ដោយលទ្ធផល ៤ ទល់ ១ ចំណែកឯ វិសាខា បានយកឈ្នះក្រុមភ្ញៀវ អគ្គិសនីកម្ពុជា ដោយលទ្ធផល ៤ ទល់ ០ នាកីឡដ្ឋាន ព្រីនស៍៕