ពានរង្វាន់បាល់ទាត់អាជីពដ៏កំពូលក្នុងប្រទេសអង់គ្លេសដែលមានឈ្មោះថា Premier League ត្រូវបានបង្កើតឡើងកាលពីឆ្នាំ ១៩៩២ គឺចំឆ្នាំកំណើតរបស់ Admin ដែលកំពុងសរសេរនេះផ្ទាលតែម្តង បើរាប់ទៅវាមានអាយុកាល ២៧ឆ្នាំ  ហើយមានតែបិសាចក្រហម Manchester United មួយគត់ដែលឈ្នះពាននេះបានច្រើនជាងគេចំនួន ១៣សម័យកាល។

រយៈពេល ២៧ឆ្នាំរាប់ទៅវាយូរដែរ ក្នុងនោះមានកីឡាករមិនច្រើនទេដែលឈ្នះពាន Premier League នៅក្រុមផ្សេងគ្នា ពួកគេទាំងនោះមានដូចជា៖

1/ Riyad Mahrez 

ខ្សែបំរើជនជាតិ អាល់ហ្សេ៊រី រូបនេះឈ្នះពាន​ Premier League លើកដំបូងកាលពីឆ្នា ២០១៦ ជាមួយកញ្រ្ចោង Leicester City ក្រោយមកក៏ផ្លាស់ចេញទៅកាន់មេឃខៀវ Manchester City ក្នុងឆ្នាំ ២០១៨ និងបានលើកពាននេះម្តងទៀតជាមួយក្លឹបថ្មីរបស់ខ្លួននៅរដូវកាល ២០១៨/២០១៩។

2/ Ashley Cole

ខ្សែការពារស្លាបជនជាតិអង់គ្លេស ចំណាយពេល៧ឆ្នាំជាមួយកំាភ្លើងធំ Arsenal ឈ្នះបានពាន Premier League ២សម័យកាលនៅឆ្នាំ ២០០១/ ២០០២ និងពានមាស ២០០៣/២០០៤។ បន្ទាប់មកក៏ចេញទៅ Chelsea នៅឆ្នំា ២០០៦ ឈ្នះបានពាន១សម័យកាលទៀតក្នុងឆ្នាំ ២០១០។ បច្ចុប្បន្នបានប្រកាសចូលនិវត្តន៏ពីអាជីពជាកីឡាករក្នុងវ័យ ៣៨ឆ្នាំ។

3/ Kolo Toure

កីឡាកររូបនេះលេងនៅអង់គ្លេសអោយតែក្រុមធំៗ ៣តែប៉ុណ្ណោះដូចជា Arsenal, Manchester City និង Liverpool។ ប៉ុន្តែធ្លាប់ឈ្នះពាន Premier League ជាមួយក្រុមតែ២ទេគឺ Arsenal នៅឆ្នាំ ២០០៤ ពានមាស និង Manchester City នៅឆ្នាំ ២០១២ បច្ចុប្បន្នអតីតកីឡាករជំរើសជាតិ កូរឌ័រវ័រ បានចូលនិវត្តន៏ហើយក្នុងវ័យ ៣៦ឆ្នាំ។

4/ N’Golo Kante

ចាប់ផ្តើមប្រលូកក្នុងសមរភូមិ Premier League ជាមួយកញ្រ្ចោង Leicester នៅប្រព័ន្ធបំរើពិតជាល្អឥតខ្ចោះ ដោយជួយអោយក្រុមចំនូលមួយនេះឈ្នះពាន Premier League ជាកំណត់ត្រាប្រវត្តិសាស្រ្តរបស់ក្លឹបក្នុងឆ្នាំ ២០១៦។ ក្រោយមកផ្លាស់ចេញទៅជួយតោខៀវ Chelsea អោយឈ្នះពាននេះជាលើកទី២របស់ខ្លួននៅឆ្នាំបន្ទាប់ ២០១៧។

5/ Gael Clichy 

ខ្សែការពារស្លាបជនជាតិបារាំងចំណាយពេលលេងនៅលីគអង់គ្លេសចំនួន ១៤ឆ្នំាជាមួយក្លឹបធំ២គឺ Arsenal និង Manchester City។ ១៨៤ប្រកួតជាមួយកាំភ្លើងធំឈ្នះពានមាសម្តងនៅឆ្នាំ ២០០៤ និង ១៣៨ប្រកួតជាមួយមេឃខៀវឈ្នះពានបាន២រដូវកាល ២០១១/២០១២ ២០១៣/២០១៤។

6/ Carlos Tevez

និយាយពីខ្សែប្រយុទ្ធខ្លាំងៗនៅលីកអង់គ្លេស ប្រិយមិត្តប្រាកដជាស្គាល់ Carlos Tevez ខ្សែប្រយុទ្ធឆ្នើមជនជាតិអាហ្សង់ទីន កំពស់ ១ម៉ែត្រ៧៣។ កីឡាករម្នាក់នេះលេងអោយបិសាចក្រហម​ Manchester United ២រដូវកាលឈ្នះពាន Premier League ទាំង២រដូវកាល ២០០៧/​២០០៨ ២០០៨/២០០៩​ សហាវឆុយម៉ាយ ក្រោយមកផ្លាស់ទៅមេឃខៀវ Manchester City ក្នុងឆ្នាំ ២០០៩ ក៏ឈ្នះពានបានម្តងទៀតនៅឆ្នំា ២០១២។

7/ Nicolas Anelka 

កីឡាករជនជាតិបារាំងរូបនេះត្រូវបានគេអោយរហ័សនាមថា Tourist Player ព្រោះគេធ្លាប់លេងអោយក្លឹបជាច្រើនចំនួន១២។ កីឡាករជនជាតិបារាំងរូបនេះក៏ជោគជ័យគួរសមក្នុងការលើកពានធំៗដែរ។​ នៅលីកអង់គ្លេសធ្លាប់ឈ្នះពាន Premier League ជាមួយ Arsenal នៅឆ្នាំ ១៩៩៨ និងមួយលើកទៀតជាមួយ Chelsea នៅឆ្នាំ ២០១០។

8/ Henning Berg

អ្នកគាំទ្របាល់ទាត់សម័យនេះអាចនិងមិនសូវស្គាល់កីឡាកររូបនេះ។ អតីតខ្សែការពារ Norway ដែលបច្ចុប្បន្នមានវ័យ ៤៩ឆ្នាំ ធ្លាប់លើកពានជាមួយកុលាបក្រហម Blackburn ម្តងកាលពីឆ្នាំ​ ១៩៩៥ ​និង២លើកជាប់គ្នាជាមួយបិសាចក្រហម Manchester United នៅឆ្នាំ ១៩៩៩ ២០០០។

9/ Mark Schwarzer

លេងក្នុងតំណែងជាអ្នកចាំទីដល់វ័យជាង ៤០ឆ្នាំមិនដែលស្គាល់រសជាតិពាន Premier League នោះទេ​ គ្រាន់តែផ្លាស់មកតោខៀវ Chelsea ក៏អាចលើកពានបានម្តងកាលពីឆ្នាំ ២០១៥ និងផ្លាស់ទៅ Leicester City នៅឆ្នំាបន្ទាប់ក៏ឈ្នះម្តងទៀតនៅឆ្នាំ ២០១៦។ ទោះជាមិនសូវបានចូលលេងក៏ Mark Schwarzer មានឈ្មោះស្រាប់នៅក្នុងក្រុមទាំងពីរ។

10/ Robert Huth

កីឡាករជនជាតិអាល្លឺម៉ង់ក៏ឈ្នះពាន Premier League នៅក្រុមពីរផ្សេងគ្នាដែរគឺលើកទី១ ជាមួយតោខៀវ Chelsea បាន២រដូវកាល ២០០៤/២០០៥ ២០០៥/២០០៦ ហើយលើកទី២ ជាមួយកញ្រ្ចោង Leicester នៅឆ្នាំ ២០១៦។ កាលពីឆ្នាំ ២០១៨ អតីតខ្សែការពាររូបនេះបានប្រកាសចូលនិវត្តន៏ពីអាជីពជាកីឡាករបាត់ទៅហើយ៕