អតីតប្រធានក្រុមជម្រើសជាតិអង់គ្លេស David Beckham នឹងត្រូវបានប្រគល់ពានរង្វាន់ UEFA President’s Award ឆ្នាំ ២០១៨ ដែលជាការទទួលស្គាល់នូវកិច្ចខិតខំប្រឹងប្រែងនិងអាជីពដ៏អស្ចារ្យរបស់គេ។

ប្រធានស្ថាប័ន UEFA លោក Aleksander Ceferin បាននិយាយនៅក្នុងសេចក្តីថ្លែងការណ៍ថា ពានរង្វាន់នេះទទួលស្គាល់នូវសមិទ្ធផលលេចធ្លោ ឧត្តមភាពប្រកបដោយវិជ្ជាជីវៈ និងគុណសម្បត្តិផ្ទាល់ខ្លួន។

បុរសវ័យ៥០ឆ្នាំក៏បានកោតសរសើរ និង ពន្យល់ពីមូលហេតុដែលជ្រើសរើស David Beckham ជាអ្នកទទួលពានរង្វាន់នៅឆ្នាំនេះព្រោះគេជា និមិត្តរូបតំណាងបាល់ទាត់ពិតនៃជំនាន់របស់គេផងដែរ។

គួររំលឹកថា អតីត​ខ្សែ​បម្រើ​ជំនាញ​ Free kick ក៏ទើបបាន​ប្រកាស​បង្កើត​ក្លឹប​បាល់ទាត់​ថ្មី​មួយដោយស្ថិត​នៅ​ក្នុង​ទីក្រុង Miami រដ្ឋ​ Florida​ ដែលនេះគឺ​ជា​ផែនការ​យូរ​អង្វែង​របស់​ខ្លួន​ដើម្បី​ប្រកួត​ប្រជែង​ក្របខ័ណ្ឌ​ Major League Soccer របស់​សហរដ្ឋ​អាមេរិក។

បុរសកូន៤ខាងលើបានចំណាយ​ពេល​១១​ឆ្នាំ​ជាមួយ​ Manchester United មុន​ចាកចេញ​ទៅ​ Real Madrid​ ក្នុង​ឆ្នាំ​២០០៣ រួចក៏បន្តទៅ​ចូលរួម​ជាមួយ LA Galaxy, AC Milan និង​ចុង​ក្រោយ​គឺ Paris Saint-Germain ហើយក៏​ប្រកាស​ចូល​និវត្តន៍​ក្នុង​ឆ្នាំ​២០១៣៕