វីរបុរស​របស់ក្រុម​កាំភ្លើងធំ Arsenal និងជាអតីតកីឡាករក្លឹប Barcelona ផង លោក Thierry Henry កំពុងតែចរចាជាមួយ​ក្លឹប Bordeaux ដើម្បីទទួលតំណែងជាអ្នក​ចាត់ការទូទៅ។ នេះបើតាមការ​ផ្សព្វផ្សាយ​របស់​សារព័ត៌មាន​បារាំង នៅ​យប់​ថ្ងៃ​ពុធនេះ។

ក្លឹប Bordeaux នៅក្របខណ្ឌកំពូលបារាំង Ligue 1 បាន​ផ្អាក​លោក Gus Poyet ពីតួនាទីជាអ្នក​ចាត់ការទូទៅ ដោយ​សារក្លឹប​រិះគន់ថា គាត់​បានធ្វើការ​ដោះដូរកីឡាករដោយ​គ្មានការ​ពិចារណា។ ហើយ​លោក Henry បាន​ចាប់​អារម្មណ៍តួនាទីនេះ បន្ទាប់ពីបាន​ពិភាក្សាជាមួយ​អតីត​គ្រូបង្វឹក​ចាស់វស្សា​របស់គាត់ គឺលោក Arsene Wenger។

សូម​ជម្រាបជូនថា លោក Henry អតីតកីឡាករជម្រើសជាតិបារាំង​ បាន​ចាក​ចេញពីមុខងារជាអ្នក​វិភាគ​បាល់ទាត់​នៅទូរទស្សន៍ Sky Sports កាលពី​ដើម​រដូវក្តៅនេះ ដោយ​លោក​បញ្ជាក់ថា​ចង់​ពង្រឹង​អាជីពជាគ្រូបង្វឹក​វិញ។ ហើយ​បច្ចុប្បន្ន លោក​ក៏កំពុងតែជាជំនួយ​ការគ្រូបង្វឹក​របស់​លោក Roberto Martinez ដែល​គ្រូបង្វឹក​ក្រុម​ជម្រើសជាតិ​បែលហ្ស៊ិក តាំងពីឆ្នាំ ២០១៦មក។ លោក Henry ក៏​ជា​មនុស្សម្នាក់ ដែល​បាន​ជួយ​ឲ្យ​បែលហ្ស៊ិក ទទួលបាន​លេខ ៣ ក្នុងព្រឹត្តិការណ៍បាល់ទាត់ពិភពលោក World Cup នៅប្រទេសរុស្ស៊ីផងដែរ៕