បន្ទាប់ពីការប្រកួត​កាលពីយប់មិញ អង់គ្លេស បានកក់​កៅអី សម្រាប់វគ្គពាក់កណ្តាល​ផ្តាច់ព្រ័ត្រ ដោយ​នឹង​ត្រូវជួបជាមួយក្រូអាស៊ី នៅថ្ងៃពុធខាងមុខ។ កីឡាករអ្នក​ចាំទីវ័យ ២៤ឆ្នាំរបស់អង់គ្លេស Jordan Pickford ត្រូវបាន​គេចាត់​ទុកថាជាវីរៈបុរស​ ក្នុងការ​ប្រកួត​យប់មិញ ហើយគេ​ក៏រំពឹងថា យុវជនម្នាក់នេះ នឹង​បង្កើត​អ្វីអស្ចារ្យ​សម្រាប់ការប្រកួតនាពេលខាងមុខ។

ក្នុងបទសម្ភាសន៍ពេលចប់ការប្រកួត Pickford បាននិយាយថា៖ «ខ្ញុំមិនទាន់កើតទេ កាលពេលដែលអង់គ្លេសឡើងវគ្គពាក់កណ្តាល​ផ្តាច់ព្រ័ត្រ។ យើង​តែងតែនិយាយថា យើង​នឹង​នាំគ្នាលេងមួយប្រកួ​តនៅវគ្គពាក់កណ្តាលផ្តាច់ព្រ័ត្រ រួចហើយ​នឹង​បង្កើតប្រវត្តិសាស្ត្រ​មួយ​ដោយ​ខ្លួនយើង»។

ចំណែក​ប្រធានក្រុម​អង់គ្លេស Harry Kane វ័យ ២៤ឆ្នាំ បាន​និយាយ​ប្រហែលគ្នានេះថា ពួកគេ​បានតាំងចិត្តហើយថា​នឹង​នាំអ្វីម្យ៉ាងទៅឲ្យ​អ្នក​គាំទ្រ​​នៅស្រុកវិញ ដើម្បីជាមោទនភាពមួយ។ Harry Kane បាននិយាយថា៖ «យើងដឹងថាវាជាការប្រកួតដ៏ធំ នៅវគ្គពាក់កណ្តាលផ្តាច់ព្រ័ត្រ ប៉ុន្តែយើងមានអារម្មណ៍ល្អ ហើយយើងជឿជាក់។  យើង​ត្រូវតែប្រកួត​ម្តងទៀត ហើយ​យើង​រីករាយ​ចំពោះវា យើង​ត្រូវតែ​បន្ត​ធ្វើអ្វីដែលយើងបាន​ធ្វើ ដើម្បីធ្វើឲ្យប្រទេសជាតិយើងមានមោទនភាព»។

គួរជម្រាបជូនថា អង់គ្លេស បាន​យក​ឈ្នះលើ​ស៊ុយអែត នៅវគ្គ ៨ក្រុម​ចុងក្រោយ​កាលពីយប់មិញ ដោយ​លទ្ធផល ២ទល់នឹង០ នៅក្នុងការប្រកួត​បាល់ទាត់ដណ្តើមពានរង្វាន់ពិភពលោក World Cup ២០១៨ ក្នុងប្រទេសរុស្ស៊ី។ ចំណែក​ម្ចាស់​ផ្ទះរុស្ស៊ី បាន​ប្រកួត​ចាញ់ ក្រុម​ក្រូអាស៊ី នៅវគ្គកាត់សេចក្តីដោយបាល់ប៉េណាំងទី ក្នុងចំនួនគ្រាប់បាល់ ៣ទល់នឹង៤។ ដូច្នេះមានន័យ​ថា អង់គ្លេស ត្រូវប្រឈមមុខជាមួយក្រូអាស៊ី នៅវគ្គពាក់កណ្តាលផ្តាច់ព្រ័ត្រ ដែល​ត្រូវប្រកួតនៅថ្ងៃពុធខាងមុខ។ សូមរម្លឹកដែរថា នេះជាលើកដំបូង​ក្នុងរយៈពេល ២៨ឆ្នាំ ដែល​អង់គ្លេស​ទើបឡើង​ដល់វគ្គពាក់កណ្តាលផ្តាច់ព្រ័ត្រជាថ្មី។ សូម្បីតែជំនាន់ កំពូល Superstars ដូចជា David Beckham ឬ Paul Scholes ក៏មិនដែលជួយ​ក្រុម​ជម្រើសជាតិអង់គ្លេស ឲ្យឆ្លងផុតវគ្គ ៨ក្រុម​ចុងក្រោយដែរ។

ជាការ​កត់សម្គាល់ ក្រុមបាល់ទាត់ជម្រើសជាតិអង់គ្លេស នៅឆ្នាំ ២០១៨នេះ សុទ្ធតែប្រមូល​ផ្តុំដោយកីឡាករក្មេងៗទាំងអស់ ដោយ​ក្នុងនោះ​កីឡាករអាយុច្រើន​ជាងគេ (លើស៣០ឆ្នាំ) មានតែប្រមាណជា ៣នាក់ប៉ុណ្ណោះ ដូចជា Ashley Young, Jamie Vardy និង Gary Cahill៕