កញ្ញា Julieth Gonzalez Theran អ្នក​រាយការណ៍ព័ត៌មាន សញ្ជាតិ​កូឡុំប៊ី ដែល​ធ្វើ​ការ​ឲ្យ​ស្ថានីយ៍ទូរទស្សន៍អាល្លឺម៉ង់ Deutshe Welle (DW) ប្រចាំទីក្រុង Saransk ប្រទេសរុស្ស៊ី ត្រូវបាន​អ្នក​គាំទ្រ​បាល់ទាត់ភេទប្រុស​ម្នាក់ ស្ទុះទៅថើប និង​ច្របាច់ដើមទ្រូង (សុដន់) របស់​នាង ពេលនាងកំពុង​រាយការណ៍ព័ត៌មាន​ផ្ទាល់ ពីទិដ្ឋភាពរបស់អ្នក​គាំទ្រ​ ក្នុងការប្រកួត​បាល់ទាត់ពិភពលោក​ World Cup នៅទីក្រុង Sarank ប្រទេសរុស្ស៊ី។

តាម​វីដេអូ ដែលនាងបាន​បង្ហោះ​ក្នុងបណ្តាញ​សង្គម គឺបុរសម្នាក់ បាន​ចូលទៅថើបថ្ពាល់នាង ហើយច្របាច់សុដន់​របស់នាងតែម្តង ប៉ុន្តែពេលនោះនាងមិន​មានប្រតិកម្មអ្វីនោះទេ ដោយនៅតែបន្ត​រាយការណ៍ព័ត៌មានជាបន្តទៀត ដើម្បីឲ្យ​ស្របតាមវិជ្ជាជីវៈជាអ្នក​សារព័ត៌មាន។

យ៉ាងណាក៏ដោយ បន្ទាប់ពីរាយការណ៍ចប់ កញ្ញា Julieth Gonzalez Theran បាន​ព្យាយាម​ទៅរក​មើល​បុរសម្នាក់នោះ តែនាងរក​មិន​ឃើញសោះ។ នាងបាន​និយាយ​ថា ៖«ខ្ញុំបាននៅទីនោះប្រហែល​ជា ២ម៉ោង ដើម្បីរៀបចំការផ្សាយ តែ​អត់មានអីកើតឡើងចំពោះខ្ញុំនោះទេ។ ប៉ុន្តែពេលដែលកំពុងផ្សាយ​ផ្ទាល់ (live) ក៏​ស្រាប់តែបុរសម្នាក់ហ្នឹង បានចេញ​មក​លូកលាន់ខ្ញុំតែម្តង។ បុរសនោះ ចូលមក​ថើប ហើយ​ច្របាច់សុដន់ខ្ញុំ  ខ្ញុំត្រូវតែបន្តការងារ ប៉ុន្តែក្រោយ​មក ខ្ញុំបានព្យាយាមរក​គេដែរ តែគេបានចេញទៅបាត់ហើយ»។

នាងបានបន្តថា៖ «យើង​មិន​ត្រូវការ​ទង្វើបែបនេះទេ យើងមានសិទ្ធិ​ស្មើគ្នាតាមវិជ្ជាជីវៈ ហើយយើងមាន​តំលៃរៀងខ្លួន»៕

ទស្សនាវីដេអូ៖