មុន​នេះបន្តិច អតីតកីឡាករ​ជម្រើសជាតិបារាំង លោក Zinedine Zidane បាន​ធ្វើឲ្យ​ពិភពលោក​ទាំងមូល មានការ​ភ្ញាក់ផ្អើល​ជាខ្លាំង តាមរយៈការ​ប្រកាស​លាចេញ​ពីតំណែងជាអ្នក​ចាត់ការទូទៅក្រុម​អធិការ Real Madrid ដែលទើបតែលើកពានរង្វាន់ក្រុមបាល់ទាត់អឺរុប Champions League កាលពីសប្តាហ៍។

Zinedine Zidane ក្នុងសន្និសីទកាសែត នៅថ្ងៃទី ៣១ឧសភានេះ។

ថ្លែងក្នុងសន្និសីទកាសែត លោក Zidane បាន​និយាយថា៖ «ខ្ញុំបាន​ធ្វើ​ការសម្រេចចិត្ត​ ដើម្បី​ជំហាន​ថ្មីមួយ។ ខ្ញុំ​ដឹងថា​វា​ចម្លែក ប៉ុន្តែក្រុម​នេះ គឺត្រូវការការផ្លាស់ប្តូរ ដើម្បីរក្សាជ័យជម្នះ ពួកគេត្រូវការ​ទស្សនវិស័យផ្សេង គឺផ្សេងពីអ្វីដែល​យើងកំពុងធ្វើ ដូច្នេះហើយ​ទើបខ្ញុំ​សម្រេចចិត្ត​ថាត្រូវតែចាកចេញ។» លោក Zidane បន្តថា៖ «ខ្ញុំ​ស្រលាញ់ Real Madrid និង​ប្រធានក្លឹប លោក Perez»។

ចំណែក លោក Perez បាន​និយថា៖ «នេះមិនមែនជាការលាគ្នាទេ! ខ្ញុំចង់​អរគុណដល់អ្វីដែល Zidane បាន​លះបង់ និងបូជា។ ខ្ញុំគិតថា គាត់ត្រូវការសម្រាកខ្លះ»។ បន្ថែមលើកការលើកឡើងនេះ លោកប្រធានក្លឹប ក៏បញ្ជាក់ថា Zidane ក៏​នឹង​មិន​ធ្វើជាគ្រូបង្វឹក​របស់ក្លឹប នៅរដូវកាលក្រោយទេ។

ក្រោយ​ចប់​ប្រសាសន៍របស់​ប្រធានក្លឹប Zidane បានបង្ហាញ​មនោសញ្ចេតនាថា៖ «អនុស្សាវរីយ៍ដ៏ល្អសម្រាប់ខ្ញុំ នៅទីនេះ គឺការ​ជឿទុកចិត្ត​របស់លោកប្រធានក្លឹប។ ក្នុងនាមជាគ្រូបង្វឹក រឿងដែល​ល្អបំផុតសម្រាប់ខ្ញុំ គឺឈ្នះពានរង្វាន់ក្របខណ្ឌ La Liga ហើយរឿងអាក្រក់បំផុត គឺបានប្រកួតចាញ់​ក្រុម Leganes ក្នុងពានរង្វាន់ Copa del Rey»។

តាមលោក​ Zidane ការសម្រេចចិត្តនេះ គឺជាការធ្វើ​ឲ្យ​ក្លឹបអាចរក្សាជ័យជម្នះបន្តទៀត។

គួរជម្រាបជូនថា ការ​ប្រកាស​ចាកចេញ​ពី​តំណែងអ្នកចាត់ការ Real Madridនេះ ធ្វើឡើង ១ សប្ដាហ៍ ក្រោយក្លឹបទើបបានតែឈ្នះ Champions League រដូវកាល ២០១៧- ២០១៨ ដោយ​បំបាក់​ Liverpool 3-1 ក្នុងកីឡដ្ឋាន ក្រុងគៀវ។ តាំងពីចូល​ដឹកនាំ​ក្លឹបយក្សអេស្ប៉ាញ កាលពីឆ្នាំ ២០១៦ លោក Zidane ត្រូវបានមជ្ឈដ្ឋានបាល់ទាត់ជាច្រើនទទួល​ស្គាល់ថា ជា​អ្នក​ចាត់ការដ៏ជោគជ័យ។ អំឡុងពេល ៣ ឆ្នាំ នៃភាពជាមេដឹកនាំនេះ លោក​នាំក្លឹប ឲ្យ​ឈ្នះពានរង្វាន់ ដល់ទៅ ៨ ក្នុងនោះរួមមានពាន Champions League ៣ឆ្នាំជាប់គ្នា (២០១៦,២០១៧,២០១៨) ពានលីកកំពូលអេស្ប៉ាញ La Liga (រដូវកាល ២០១៦-១៧) ពាន UEFA Super Cup ២លើក FIFA Club World Cup ២លើក និង Supercopa de Espana ១លើក៕