ប្រធានក្លឹប Florentino Perez៖ ខ្ញុំមិនដែលរំពឹងថា Zidane សម្រេចចិត្តបែបនេះឡើយ
លោកប្រធានក្លឹប Real Madrid លោក Florentino Perez កាលពីម្សិលមិញបាននិយាយថា លោកមិនបានរំពឹងទុកថា លោក Zinedine Zidane នឹងលាលែងពីតំណែងជាអ្នកចាត់ការក្លឹបឡើយ។
ក្នុងសន្និសីទឥតព្រាងទុកថ្ងៃនេះ លោក Perez បាននិយាយថា លោកភ្ញាក់ផ្អើលក្រោយ Zidane ប្រាប់ខ្លួនថាលោកចង់លាលែងពីតំណែង ក្រោយទើបឈ្នះ Champions League កាលពីពេលថ្មីៗនេះ។ ប្រធានក្លឹបរូបនេះ បានឲ្យដឹងថាខ្លួនបានព្យាយាមបញ្ចុះបញ្ចូលអ្នកចាត់ការសញ្ជាតិបារាំងឲ្យគិតឡើងវិញ តែនៅតែមិនបានសម្រេច។
លោក Perez និយាយ៖ “ក្រោយឈ្នះ Champions League ខ្ញុំមិនបានរំពឹងទុកថា Zidane នឹងសម្រេចចិត្តបែបនេះឡើយ។ គេដឹងច្បាស់ថា ខ្ញុំស្រលាញ់ និងគាំទ្រគេប៉ុណ្ណា”។ យ៉ាងណាក្តីមហាសេដ្ឋីរូបនេះសង្ឃឹមថា លោក Zidane នឹងត្រលប់មកដឹកនាំក្លឹបនាពេលអនាគត។
គួររំលឹកថា ក្នុងអំឡុងពេល ៣ ឆ្នាំក្នុងការដឹកនាំ Real Madrid លោក Zinedine Zidane ឈ្នះពានជាមួយក្លឹបដល់ទៅ ៨ ពាន ក្នុងនោះរួមមានពាន Champions League ៣ឆ្នាំជាប់គ្នា ពានលីគកំពូលអេស្ប៉ាញ (រដូវកាល ២០១៦/១៧) ពាន UEFA Super Cup ២លើក FIFA Club World Cup ២ដង និង Supercopa de Espana មួយលើកផងដែរ៕