សមាជិកសភាបារាំង អ្នកស្រី Valerie Boyer បានស្នើឱ្យដកហូត Ballon D’Or និងសញ្ជាតិបារាំងពី Karim Benzema ដោយចោទខ្សែប្រយុទ្ធក្លិប Al Ittihad រូបនេះគាំទ្រក្រុមភាតរភាពមូស្លីម។

កាលពីថ្ងៃទី១៦ ខែតុលា រដ្ឋមន្ត្រីក្រសួងមហាផ្ទៃបារាំងលោក Gerald Darmanin បានចោទប្រកាន់ Benzema ថាមានទំនាក់ទំនងជាមួយក្រុមភាតរភាពមូស្លីម បន្ទាប់ពីអតីតខ្សែប្រយុទ្ធ Real បានអំពាវនាវឱ្យមានការគាំទ្រដល់ប្រជាជននៅតំបន់ហ្គាហ្សាដែលប្រឈមមុខនឹងការវាយប្រហារពីអ៊ីស្រាអែល។

លោក Darmanin បានប្រាប់ CNews ថា “ក្នុងរយៈពេលប៉ុន្មានសប្តាហ៍កន្លងមកនេះ ខ្ញុំបានយកចិត្តទុកដាក់ជាពិសេសចំពោះទំនាក់ទំនងរបស់ Benzema ទៅនឹងភាតរភាពមូស្លីម”។

Darmanin មិន​បាន​ផ្តល់​ភស្តុតាង​ដើម្បី​បញ្ជាក់​ពី​ការ​ថ្លែង​របស់​គេ​ទេ។ CNN បាន​ទាក់ទង​ទៅ​រដ្ឋមន្ត្រី​បារាំង​ដើម្បី​សួរ​បន្ថែម​អំពី​ការ​ចោទ​ប្រកាន់​លើ Benzema ប៉ុន្តែ​មិន​បាន​ទទួល​ការ​ឆ្លើយ​តប​ទេ។ ទោះជាយ៉ាងណាក៏ដោយ សេចក្តីថ្លែងការណ៍នេះបានធ្វើឱ្យមានការរំជើបរំជួលនៅក្នុងមតិសាធារណៈ ហើយសមាជិកសភា Boyer បាននិយាយថា Benzema គួរតែត្រូវបានដាក់ទណ្ឌកម្ម ប្រសិនបើការចោទប្រកាន់របស់រដ្ឋមន្ត្រីគឺជាការពិត៕