សហព័ន្ធកីឡាបាល់ទាត់ឥណ្ឌូនេស៊ីបានតែងតាំងជាផ្លូវការលោក Indra Sjafri កាន់តំណែងជាគ្រូបង្គោលក្រុមបាល់ទាត់ជម្រើសជាតិឥណ្ឌូនេស៊ីអាយុក្រោម២៣ឆ្នាំជំនួសលោក Shin Tae-yong។ Indra Sjafri ពីមុនធ្លាប់កាន់តួនាទីជានាយកបច្ចេកទេសនៃសហព័ន្ធកីឡាបាល់ទាត់ឥណ្ឌូនេស៊ី (PSSI) ប៉ុន្តែឥឡូវនេះលោកនឹងដឹកនាំក្រុម U23 ចូលរួមប្រកួតនៅស៊ីហ្គេមលើកទី៣២។

ទន្ទឹមនឹងនេះដែរ គ្រូបង្វឹក Shin Tae-yong នឹងផ្តោតលើការដឹកនាំក្រុម U20 ឥណ្ឌូនេស៊ី ក្នុងការប្រកួត AFC U20 Finals ឆ្នាំ 2023។ នេះបើយោងតាមការប្រកាសរបស់ PSSI ។ កាលពីឆ្នាំមុន លោក Shin Tae-yong និង U23 ឥណ្ឌូណេស៊ី ឈ្នះមេដាយសំរឹទ្ធលើវិញ្ញាសាបាល់ទាត់បុរសក្នុងព្រឹត្តិការណ៍ស៊ីហ្គេមលើកទី៣១ នៅវៀតណាម។

ស៊ីហ្គេមលើកទី៣២ នឹងចាប់ផ្តើមនៅថ្ងៃទី៥ ខែឧសភា ឆ្នាំ២០២៣ នៅប្រទេសកម្ពុជា។ ទន្ទឹម​នឹង​នេះ ការ​ប្រកួត​ជុំ​ចុង​ក្រោយ​នៃ U20 World Cup នឹង​ប្រព្រឹត្ត​ទៅ​នៅ​ថ្ងៃ​ទី ២០ ខែ​ឧសភា នៅ​ប្រទេស​ឥណ្ឌូនេស៊ី។

លោក Indra Sjafri វ័យ៥៩ឆ្នាំ ធ្លាប់ដឹកនាំ U19 ឥណ្ឌូនេស៊ី ឈ្នះជើងឯក U19 អាស៊ីអាគ្នេយ៍ឆ្នាំ២០១៣ និងដឹកនាំក្រុម U22 ឈ្នះការប្រកួតថ្នាក់តំបន់ឆ្នាំ 2019 ។ នៅ​ស៊ីហ្គេម​លើក​ទី​៣០ គ្រូ​បង្វឹក Indra Sjafri និង U22 ឥណ្ឌូនេស៊ី​ឈ្នះមេដាយប្រាក់ ក្រោយចាញ់ ០-៣ នៅវគ្គផ្តាច់ព្រ័ត្រទល់នឹង U22 វៀតណាម។

ជាមួយគ្នានេះ PSSI បានស្នើសុំគ្រូបង្វឹក Shin Tae-yong ដើម្បីជួយ U20 ឥណ្ឌូនេស៊ី ទទួលបានលទ្ធផលខ្ពស់ក្នុងការប្រកួតចំនួនពីរនាពេលខាងមុខគឺ U20 Asia និង U20 World Cup 2023៕