សារពត៌មាន Dailymail នៅអង់គ្លេសបានរាយការណ៍អោយដឹងថា Manchester United កំពុង​​សម្លឹង​លក់​ចេញ​ខ្សែ​ការពារ​ចំនួន​៦​នាក់​ មុន​ពេល​ទីផ្សារ​ដោះដូរ​​​​កីឡាករ​ត្រូវ​បិទ​​ក្នុង​រយៈពេល​មួយ​ខែ​ទៀត។

អ្នក​ចាត់​ការ​ថ្មី Erik ten Hag កំពុង​បន្ត​រៀបចំ​ក្រុម​ឡើង​វិញ ដូច្នេះលោកចង់បញ្ចេញកីឡាករដែលមិនស្ថិតក្នុងគម្រោងរបស់លោក។ សម្រាប់កីឡាករដែលក្លិបបិសាចក្រហមចង់លក់ចេញមានដូចជា Alex Telles, Aaron Wan-Bissaka, Erik Baily, Axel Tuanzebe, Ethan Laird និង Phil Jones ដែលសុទ្ធសឹងតែ​​​មិន​សូវ​ជាតម្រូវ​ការ​នៅទឹកដី​ Old Trafford។

ការ​មក​ដល់​របស់​ខ្សែ​ការពារ Tyrell Malacia បាន​រុញ Alex Telles ទៅ​រក​ទ្វារ​ចាកចេញ។​Wan-Bissaka ដែល​ Man UTD ​ទិញ​ពី​ Crystal Palace ក្នុង​តម្លៃ​ខ្លួន​៥០​លាន​ផោន​កាល​ពី​ឆ្នាំ​២០១៩ ហាក់​បង្ហាញ​ទម្រង់​លេង​មិន​សូវ​ល្អ​ដូច​ដែល​ក្លឹប​បាន​រំពឹង​សោះ។ ​Crystal Palace ពេល​នេះ​ចាប់​អារម្មណ៍​​ចង់​ខ្ចី​ជើង​កីឡាករ​របស់​ខ្លួន​ត្រលប់​ទៅ​វិញ ស្របពេល United មិន​សូវ​ប្រើ​ការ។

រីឯកីឡាករ​ Phil Jones ដែល​ញាំញី​ដោយ​សារ​បួស​កំពុង​​​ត្រូវ​បាន​សម្លឹង​ឃើញ​ពី​ក្លឹប​នៅ​អាមេរិក D.C United ដែល​ដឹក​នាំ​ដោយ​អតីត​មិត្តរួម​ក្រុម Wayne Rooney។ Baily សញ្ជាតិ​​កូឌីវ័រ​ Man Utd ទិញ​មក​កាល​ពី​ឆ្នាំ​២០១៦​ក្នុង​តម្លៃ​ខ្លួន​៣០​លាន​ផោន​ កំពុង​មាន​ការ​ចាប់​អារម្មណ៍​ពី​ក្លឹប​៣​គឺ AC Milan, Fulham និង Sevilla៕ ​ ​

អត្ថបទន៖ F11