កីឡាករជាច្រើននៅ Manchester United គិតថា ការបង្ហាត់របស់លោក Ralf Rangnick ហួសសម័យទៅហើយ។

បើតាមប្រភពពី ESPN កីឡាករជាច្រើនមិនសូវសប្បាយចិត្តប៉ុន្មានទេ ពីព្រោះលោក Rangnick ឲ្យគ្រូជំនួយ Chris Armas ដឹកនាំការបង្ហាត់ទៅវិញ។ កូនក្រុមបានប្រដូចគ្រូជំនួយ Armas ទៅ Ted Lasso ដែលជាតួអង្គគ្រូបង្វឹកក្នុងរឿងកំប្លែង ដែលមិនស័ក្ដិសមនឹងកម្រិតរបស់​ Man UTD។

គ្រូជំនួយ Armas មិនមានបទពិសោធច្រើនក្រៅពីលីគអាមេរិកទេ។ Armas ទើបតែត្រូវបាន Toronto FC បណ្ដេញចេញ ក្រោយដឹកនាំឈ្នះតែ២ប្រកួតក្នុងចំណោម១៥ប្រកួត។ Armas ត្រូវបានលោក Rangnick យកមករួមក្រុមនៅ Old Trafford។

ទន្ទឹមនឹងនេះដែរ កីឡាករខ្លះថា Rangnick ផ្ដោតតែបង្ហាត់បែប១១ទល់១១ មិនសូវផ្ដោតលម្អិត។

ក្រោមការដឹកនាំរបស់លោក Rangnick កីឡាករធ្វើលំហាត់ពង្រឹងការលេងជាក្រុម និងកាយសម្បទា។ កីឡាករមិនសូវបានហាត់សម្រួចជំនាញផ្ទាល់ខ្លួនប៉ុន្មានទេ។

យ៉ាងណា ការលេងរបស់ក្រុមក៏គ្រាន់បើបន្តិចដែរ ដោយរបូត៩គ្រាប់ក្នុងចំណោម១២ប្រកួត។ បើមុនគ្រូ Rangnick ចូលមក ពួកគេរបូត២៤គ្រាប់ក្នុងចំណោម១២ប្រកួត៕