Manchester United បានអនុញ្ញាតឲ្យ Victor Lindelof បានសម្រាកពីការប្រកួតតទល់ West Ham ដើម្បីយកពេលផ្ដល់កម្លាំងចិត្តដល់ប្រពន្ធ និងកូនៗ ដែលមិនទាន់បាត់ភាពភ័យខ្លាចពីហេតុការណ៍ចោរគាស់ផ្ទះ។

ក្នុងការប្រកួតតទល់ Brentford កាលថ្ងៃទី២០ ខែមករា មានហេតុការណ៍ចោរចូលគាស់ផ្ទះ Lindelof នៅ Manchester។ នាពេលនោះ Lindelof កំពុងប្រកួត ហើយប្រពន្ធ និងកូនៗរបស់គេនៅផ្ទះ។ គេថា ប្រពន្ធ និងកូនៗត្រូវសំងំក្នុងបន្ទប់ពេលចោរកំពុងធ្វើសកម្មភាព។

ខ្សែការពារជម្រើសជាតិស៊ុយអែតប្រាប់ថា ប្រពន្ធ និងកូនៗរបស់គេមិនអីទេ តែនៅមានអារម្មណ៍ភ័យខ្លាច មិនទាន់បាត់។

លោក Ralf Rangnick អ្នកចាត់ការ Manchester United ឲ្យដឹងថា លោកបាន​ពិភាក្សាជាមួយ Lindelof រួចរាល់ហើយ ហើយគេទទួល​បានការអនុញ្ញាតពិសេសពីក្លិប ព្រោះគ្រួសាររបស់គេពិតជាត្រូវការនៅក្បែរយ៉ាងខ្លាំង៕