Lando Norris អ្នកប្រណាំងរថយន្ត F1 បានបាត់នាឡិកាតម្លៃ១លានដុល្លាសហរដ្ឋអាមេរិករបស់ខ្លួន ក្រោយស្ថិតក្នុងហេតុការណ៍ការប៉ះទង្គិចគ្នារបស់អ្នកគាំទ្រនៅក្រៅកីឡដ្ឋាន Wembley បន្ទាប់ពីបញ្ចប់ការប្រកួតវគ្គផ្តាច់ព្រ័ត្រ Euro 2020។

កីឡាករវ័យ២១ឆ្នាំត្រូវបានគេរាយការណ៍មកថាមានបុរស២រូបបានធ្វើសកម្មភាពវាយប្រហារលើរូបគេក្នុងពេលដែលគេដើរទៅកាន់ចំណតឡាននៅកីឡដ្ឋាន ស្របពេលដែលកំពុងមានចលាចល។ ដោយឡែកក៏មានសាក្សីបានឃើញផ្ទាល់ភ្នែកអំពីហេតុការណ៍ខាងលើនេះផងដែរ ខណៈក្រុមប៉ូលីសកំពុងតែបើកការស៊ើបអង្កេត។

ក្រោយជួបហេតុការណ៍ដ៏អាក្រក់ខាងលើនេះ សមាជិក McLaren ក៏បានបញ្ចេញសារអរគុណសម្រាប់អ្នកគាំទ្រដែលបានបង្ហាញពីអារម្មណ៍សោកស្តាយមកលើរូបគេផងដែរ។

គួរឱ្យដឹងថា ក្រោយពីបញ្ចប់ព្រឹត្តិការណ៍ Euro 2020 ដោយអង់គ្លេសមិនអាចក្លាយជាម្ចាស់ពានរង្វាន់បាន មានហេតុការណ៍ជាច្រើនបានកើតឡើងនៅជុំវិញកីឡដ្ឋាន Wembley ក៏ដូចជាមានការប៉ះទង្គិចគ្នារវាងអ្នកគាំទ្រផងដែរ។