កាលពីពេលថ្មីៗនេះ គ្រូបង្វឹក Zinedine Zidane បានសម្រេចចិត្តចាកចេញពី Real Madrid សារជាថ្មីម្តងទៀត ក្រោយពីដឹកនាំក្រុមមិនទទួលបានពានរង្វាន់អ្វីសោះនៅរដូវកាល២០២០/២១។

Real Madrid បានធ្លាក់ចេញពីពានរង្វាន់ UEFA Champions League នៅវគ្គពាក់កណ្តាលផ្តាច់ព្រ័ត្រក្រោមថ្វីជើងរបស់ក្រុមតោខៀវ​ Chelsea ខណៈពានរង្វាន់ La Liga គឹបានទៅលើ Atletico Madrid ដែលឈ្នះនៅថ្ងៃបិទរដូវកាល។

ក្រោយពីដឹកនាំ Real Madrid ឈ្នះពានរង្វាន់​ UEFA Champions League ៣សម័យជាប់ៗគ្នា គ្រូបង្វឹក Zinedine Zidane បានប្រកាសលាឈប់ទាំងគួរភ្ញាក់ផ្អើល ខណៈការត្រឡប់មកដឹកនាំវិញជាលើកទី២គឺមិនជោគជ័យដូចកាលពីលើកដំបូងរបស់ខ្លួនឡើយ។

យ៉ាងណាក្តីក្រោយពីប្រកាសលាឈប់ ទើបតែពេលនេះ Zizou បានចេញសេចក្តីថ្លែងការណ៍មួយទៅកាន់ប្រិយមិត្តរបស់ Real Madrid ថា៖ ” ខ្ញុំគឺជាមនុស្សដែលចូលចិត្តជ័យជម្នះពីកំណើត ហើយខ្ញុំមកទីនេះគឺដើម្បីឈ្នះពានរង្វាន់។ ខ្ញុំពិតជាឈឺចាប់ខ្លាំងណាស់នៅពេលដែលខ្ញុំបានមើលព័ត៌មាន ក្រោយពេលប្រកួតចាញ់ ពួកគេនិយាយថាខ្ញុំនឹងត្រូវក្លឹបបញ្ចប់តំណែងភ្លាមៗបើសិនជាមិនអាចឈ្នះនៅប្រកួតក្រោយបាន។ សម្រាប់ការចាកចេញលើកនេះគឺដោយសារតែខ្ញុំគិតថា Real Madrid បាត់បង់ទំនុកចិត្តលើខ្ញុំ។”

គួរឱ្យដឹងថា អតីតគ្រូបង្វឹក Inter Milan លោក Antonio Conte និងគ្រូបង្គោល Real Madrid B លោក Raul Gonzalez គឺជាបេក្ខជន២រូបនាំមុខគេក្នុងការទៅជំនួសលោក Zidane នៅរដូវកាលថ្មីនេះ។