(BC-99)

ខ្សែបម្រើ Bernardo Silva សង្ឃឹមថា Manchester City នឹង​អាចរក្សាកំណត់ត្រា ១០០ ភាគរយរបស់ខ្លួនពេល​ប៉ះ​ជាមួយ Liverpool នៅថ្ងៃអាទិត្យនេះ។

ហង្សក្រហមបានថ្លោះ​ធ្លោយ​ចាញ់​ការ​ប្រកួត​នៅ​ Premier League ៣ លើកចុងក្រោយរបស់ពួកគេនៅឯកីឡដ្ឋាន Etihad ដែល​ជា​ហេតុ​ធ្វើ​ឱ្យ​ Bernardo បាននិយាយ​យ៉ាង​ដូច្នេះ​ថា៖ “យើងរំពឹងថានឹងមានការប្រកួតដ៏ស្វិតស្វាញមួយជាមួយ Liverpool យើងដឹងថាពួកគេខ្លាំងនិងរឹងមាំដែលជាក្រុមខ្លាំងបំផុតមួយក្នុងពិភពលោក។ ពួកគេក៏ជាគូប្រជែងដ៏​ស្រួច​ស្រាវ​សម្រាប់តំណែងជើងឯក Premier League របស់យើង​ផងដែរ ដូច្នេះយើងដឹងថាវាពិតជាលំបាកប៉ុណ្ណា ប៉ុន្តែគោលបំណងរបស់យើងគឺចង់ឈ្នះគ្រប់ការប្រកួតទាំងអស់។​​ ពេល​យើង​លេងនៅក្នុង​ផ្ទះ យើង​តែង​តែទទួល​ផល​វិជ្ជមាន។ យើងត្រូវការ ៣ ពិន្ទុ​ដើម្បីដណ្តើមយកតំណែងរបស់យើងនៅកំពូលតារាងមក​វិញ​”។

គួរ​បញ្ជាក់​ថា​ឯតទគ្គកម្មរបស់​កីឡាករ​សញ្ជាតិ​ព័រទុយហ្កាល់​រូប​នេះ​ពេល​ប៉ះ​ប្រកួត​ជាមួយ​ក្រុម​ហង្សក្រហម​ធ្លាប់​បង្ហាញ​វត្តមាន​ចំនួន​៧​ដង​គ្រប់​កម្មវិធី​ដោយ​ជួយ​ឱ្យ​ Manchester City ឈ្នះ៣​និង​ស្មើ​១ រី​ឯ​រូប​គេ​ក៏​បាន​ស៊ុត​បញ្ចូល​ទី​លើ​ក្រុម​លោក Klopp បាន​២​គ្រាប់​និង​បញ្ជូន​បាល់​ស៊ុត​បញ្ចូល​ទីបាន​ម្តង​ផង​ដែរ។ ជំនួប ​Manchester City-Liverpool នៅ​ថ្ងៃ​អាទិត្យ​នេះ​ក៏​មាន​ការ​ផ្សាយ​បន្ត​ផ្ទាល់​ចាប់​ពី​វេលាម៉ោង ២៣:៣០ តាម​រយៈក្រុមហ៊ុនទូរទស្សន៍ CBS ផង​ដែរ។​