Ronaldinho ទទួលបានគ្រឿងអលង្ការពិសេសមួយដែលត្រូវបានរចនាជាមួយឈ្មោះក្លិបគេធ្លាប់ប្រកបអាជីពកន្លងមក។ យ៉ាងណា គេនឹងដាក់ដេញថ្លៃចិញ្ចៀនដ៏ស្រស់ស្អាតនេះទៅអង្គការសប្បុរសធម៌។

“អរគុណច្រើនចំពោះចិញ្ចៀនពិសេសមួយវង់នេះដែលតំណាងឲ្យអាជីពរបស់ខ្ញុំ។ ខ្ញុំពិតជារីករាយក្នុងការផ្ដល់ចិញ្ចៀនដែលមិនគួរឲ្យជឿនិងអស្ចារ្យនេះដល់អង្គការសប្បុរសធម៌ ដោយខ្ញុំនឹងដាក់ដេញថ្លៃវា។ ប្រាក់ចំណេញទាំងអស់នឹងត្រូវបានទុកជួយក្មេងៗ”។ នេះជាអ្វីដែល Ronaldinho បានសរសេរពាក្យថ្លែងអំណរគុណ​ និងប្រកាសដាក់ដេញថ្លៃចិញ្ចៀននៅលើទំព័រផ្ទាល់ខ្លួន។”

យោងទៅតាម Infobae ក្រុមហ៊ុនគ្រឿងអលង្ការបានរចនាចិញ្ចៀនដោយផ្អែកលើការបំផុសគំនិតពីអាជីពរយៈ១៧ឆ្នាំរបស់អតីតកីឡាករជម្រើសជាតិប្រេស៊ីល។ នៅលើចិញ្ចៀនត្រូវបានឆ្លាក់ឈ្មោះក្លិបទាំង៧ដែល Ronaldinho ធ្លាប់លេងមាន Gremio, Barcelona, ​​AC Milan, CR Flamengo, Atletico Mineiro, Queretaro និង Fluminense។

ប៉ុន្តែភ្លាមៗបន្ទាប់ពី Ronaldinho បានចែករំលែករូបថត អ្នកគាំទ្របានប្រទះឃើញកំហុសចំនួនពីរ។ អ្នករចនាភ្លេចដាក់ឈ្មោះ Paris Saint Germain ដែលគេធ្លាប់លេងមុនទៅ FC Barcelona នៅឆ្នាំ២០១៣ និងឈ្មោះក្លិប Queretaro នៅម៉ិកស៊ីកូឆ្នាំ ២០១៤ ដល់ឆ្នាំ ២០១៥។ ដោយសារតែកំហុសឆ្គងនេះ ក្រុមហ៊ុនខាងលើក៏បានបង្ហោះរូបភាពថ្មីភ្ជាប់ជាមួយឈ្មោះក្លិបទាំងពីរវិញ។

ការដាក់ដេញថ្លៃចិញ្ចៀនមួយវង់នេះត្រូវបានប្រព័ន្ធផ្សព្វផ្សាយព្យាករថា ចាប់ផ្ដើមពី៥,០០០អឺរ៉ូ។

គួររំឭកថា នៅថ្ងៃទី ២៤ ខែសីហា Ronaldinho ត្រូវបានដោះលែងពីពន្ធនាគារនៅប៉ារ៉ាហ្គាយ បន្ទាប់ពីជាប់ឃុំជិត៦ខែនៅប៉ារ៉ាហ្គាយពីប្រើប្រាស់លិខិតឆ្លងដែនក្លែងក្លាយ។ បច្ចុប្បន្នបុរសវ័យ៤០ឆ្នាំកំពុងរីករាយនឹងជីវិតនៅឯស្រុកកំណើតនាក្រុង Porto Alegre ប្រទេសប្រេស៊ីល៕