បើទោះបីការប្រកួតបានផ្អាកកន្លះម៉ោង ដោយសារទឹកភ្លៀងដក់លើទីលានក្តី ក៏ជំនួបនេះបានបន្តដល់ទីបញ្ចប់ ដោយក្រុមភ្ញៀវ បឹងកេត បានយកឈ្នះ កងយោធពលខេមរភូមិន្ទ ហៅទ័ព ជាលទ្ធផល ២ ទល់ ០ នាកីឡដ្ឋានស្តាតចាស់ ធ្វើអោយ បឹងកេត កាន់តែជិតលើកពានលីគនារដូវកាល២០២០នេះ ពោលគឺសុំត្រឹមស្មើនាប្រកួតសប្តាហ៍ចុងក្រោយទៀតប៉ុណ្ណោះ។

គ្រាប់បាល់ជ័យជន្នះរបស់ភ្ញៀវ បឹងកេត ធ្វើបានសម្រេចដោយខ្សែប្រយុទ្ធ Dzarma Bata ទាំងពីរគ្រាប់ ពោលគឺនៅនាទី៦១ និងនាទី៨៣ ដូច្នេះហើយក្រុមជើងឯកបីសម័យកាលនេះ កំពុងមាន ៤០ពិន្ទុ ក្នុងដៃ លើសក្រុមលេខ២ ព្រះខ័នរាជស្វាយរៀង ចំនួន ២ពិន្ទុ ។ ស្របពេលដែលការប្រកួតលីគកំពូលកម្ពុជា នារដូវកាល២០២០ នៅត្រឹមមួយសប្តាហ៍ទៀតប៉ុណ្ណោះនិងបញ្ចប់ជាស្ថាពរ។

គួរបញ្ជាក់ផងដែរថា ជំនួបសប្តាហ៍ចុងក្រោយរបស់ បឹងកេត ត្រូវជួបក្រុម ភ្នំពេញក្រោន ដែលជំនួបនេះមិនអាចចាញ់បាននេះទេ គឺមានតែឈ្នះនិងស្មើ បើសិនជា ព្រះខ័នរាជស្វាយរៀង ឈ្នះក្រុម ណាហ្គាវើលដ៍ នាប្រកួតបិទលីគនេះ៕