(BC-99)

អតីតអ្នកចាំទីក្រុមបិសាចក្រហមលោក Mark Bosnich និយាយថា Manchester United ចាំបាច់ត្រូវតែ​គិតឱ្យបានម៉ត់ចត់អំពីអនាគតរបស់ David de Gea ។

កន្លែងរបស់ De Gea នៅក្នុង​ក្រុមដែល​ដឹក​នាំ​ដោយ​ Ole Gunnar Solskjaer កំពុង​តែ​ស្ថិត​ក្នុង​ស្ថានភាព​មិនល្អបន្ទាប់​ពី​ការបរាជ័យ FA Cup ៣-១ វគ្គពាក់កណ្តាលផ្តាច់ព្រ័ត្រក្រោមថ្វីជើងគូប្រជែង​តោ​ខៀវ​ Chelsea ។

អ្នកចាត់ការក្រុមបិសាចក្រហមរូបនេះនៅ​តែ​រក្សាជំនឿចិត្តជាមួយកីឡាករចាំទី​អេស៉្បាញបន្ទាប់​ពី​រូបគេបានរក្សាសំណាញ់​ទី​បាន​យ៉ាង​ល្អ​ក្នុងជ័យជម្នះ ២-០ លើក្រុម Leicester City នៅថ្ងៃចុងក្រោយនៃការ​ប្រកួត​បិទ​រដូវកាល Premier League ដែលធានាអោយ​ក្រុម​ទទួល​បានចំណាត់ថ្នាក់លេខ​៣​ជា​កន្លែង​ដែលក្រុមបិសាចក្រហមត្រូវ​ការ​យក​ទៅ​លេង Champions League រដូវ​កាល​ក្រោយ​។

De Gea ត្រូវបានជាប់​ឆ្នោត​ជាកីឡាករឆ្នើមប្រចាំឆ្នាំរបស់ United ៤ ដងក្នុង ៦ រដូវកាលប៉ុន្តែចំនួនរបូត​គ្រាប់​បាល់​ដ៏​ច្រើន​ដែល​ឈាន​ដល់​ចំនុច​គួរឱ្យព្រួយបារម្ភបានកើតឡើងនៅរយៈពេល ២ ឆ្នាំកន្លងមកនេះ។

ជាការពិតចាប់តាំងពីដើមឆ្នាំ ២០១៨-១៩ គេ​បានធ្វើអោយ​មាន​កំហុស ៧ ដង​នៅ Premier League តែ​ចំនួន​នេះ​នៅ​តិច​ជាង​អ្នក​ចាំទី​ Martin Dubravka និង Jordan Pickford ដែល​បាន​បង្ករ​កំហុស​ចំនួន​៨​ដង​។

អតីត​អ្នក​ចាំ​ទី​ដែលបាន​ជួយ​ Man Utd អោយ​ក្លាយ​ជាជើងឯកក្នុងឆ្នាំ ១៩៩៩-២០០០ បានបង្ហាញ​ការ​គាំទ្រដល់​ De Gea ក្នុងការកែប្រែ​ទម្រង់លេងអោយ​បាន​ល្អបំផុតរបស់ខ្លួនឡើងវិញប៉ុន្ត United ក៏​ត្រូវគិតពិចារណាឱ្យបានដិតដល់ចំពោះអនាគតរបស់ Dean Henderson មួយទៀត​ដែរ​។

លោក​ Bosnich បាន​ប្រាប់ទូរទស្សន៍ Sky Sports News ថា “ខ្ញុំពិតជាជឿថាគាត់នឹងបង្ហាញខ្លួនគាត់ម្តងទៀត គាត់(De Gae) ជា​អ្នក​ចាំទី​ដ៏​ពូកែយូរណាស់មកហើយ ។ ជាក់ស្តែងនៅពេលអ្នកចាប់ផ្តើមធ្វើខុសដូចដែលគាត់បានធ្វើក្នុងរយៈពេល ៦ ទៅ ១២ ខែចុងក្រោយនេះមនុស្សម្នារ​ចាប់ផ្តើមបើកភ្នែកចាប់​អារម្មណ៍​សង្កេត​លើ​ហេតុ​ការណ៍​កំពុង​កើត​មានឡើង ដូច​ជាស្ថានភាពដែលធ្វើឱ្យក្លឹបបិសាចក្រហមធ្លាក់​ចេញ​ពី​ FA Cup វគ្គពាក់កណ្តាលផ្តាច់ព្រ័ត្រជា​ឧទាហរណ៍​ស្រាប់​។ ពួក​គេ​ចាប់​ផ្តើមចោទ​ជា​សំណួរផ្សេងៗ។ ដូចគ្នានេះផងដែរការមានអ្នក​ចាំទី​ណា​ម្នាក់ដូចជា Dean Henderson លេងបានយ៉ាងល្អនៅជា​មួយ​ក្រុម​ផ្សេង​ទៀត​ពេល​នោះ​ Manchester United នឹង​ត្រូវ​ឆ្លើយតប​ចំពោះ​សំណួរ​របស់​អ្នក​រាល់​គ្នា​។ ពួក​គេ​ច្បាស់​ជា​ឆ្ងល់​ថា​ហេតុអ្វី​បាន​ជា​ Ole នៅ​តែ​ជឿ​ទុក​ចិត្ត​លើ​អ្នក​ចាំទី​រូប​នេះ​បើ​ទោះ​ជា​ត្រូវ​ធ្លាក់​ចេញ​ពី FA Cup ក៏ដោយ។ គាត់បានបង្ហាញថាការ​សម្រេច​ចិត្ត​របស់​គាត់​គឺ​ជា​ត្រឹមត្រូវ។ ប៉ុន្តការឆ្ពោះទៅមុខក្នុង​ក្រប​ខណ្ឌ​​ Champions League ពួកគេពិតជាចាំបាច់ត្រូវគិតឱ្យបានម៉ត់ចត់អំពីបញ្ហានេះ។ ប្រសិនបើ United មិន​ចង់​បាត់​បង់​ Dean Henderson ទេ​ពួគេ​ពុំ​គួរ​បន្ត​អោយ​ក្លឹប​ផ្សេង​ខ្ចីយក​ទៅ​ចាំទីទៀត​នោះ​ទេ”​។

គួរ​ឱ្យ​ដឹង​ដែរ​ថា​លោក Mark Bosnich ក៏​ជា​អតីត​កីឡាករ​ថ្នាល​និង​កីឡាករ​ឈុត​ធំដៃទី២​របស់​ក្រុម​បិសាច​ក្រហម Manchester United ផង​ដែរនា​អំឡុង​ទស្សវត្ស​ទី ៩០ ក្រៅ​ពី​នោះ​លោក​ក៏​ធ្លាប់​ប្រឡូក​ខ្លួន​ក្នុង​នាម​ជា​អ្នក​ចាំទី​ជាមួយ​ក្លឹប Aston Villa និង Chelsea មុន​នឹង​ចាក​ចេញ​ទៅ​ប្រកប​អាជីព​ជា​មួយបណ្តារ​ក្លឹប​នៅ​ អូស្ត្រាលី ដែល​ជា​ប្រទេស​កំណើត​វិញ​រហូត​ដល់ចូល​និវតន្តន៍​នៅ​ឆ្នាំ ២០០៩។ ​