(BC-99)

Bayer Leverkusen សង្ឃឹមថានឹងរក្សា Kai Havertz សម្រាប់រដូវកាលក្រោយដោយ​សម្អាង​ថា​មិន​មាន​គោលការណ៍​ឱ្យរូប​គេ​ចាកចេញដើម្បី​កាត់បន្ថយការ​ចំណាយ​របស់​ក្លឹប​នោះទេ។

កីឡាករខ្សែ​បម្រើ​ប្រយុទ្ធ​​វ័យ ២០ ឆ្នាំរូបនេះបានវិវត្តន៍​ទេពកោសល្យដ៏អស្ចារ្យ​នៅ​ក្របខណ្ឌ Bundesliga និង​កំពុង​តែ​ផ្សារភ្ជាប់ជាមួយនឹងការ​ចង់​បាន​ពី​ក្លឹបកំពូលៗជាច្រើនរួមមាន Bayern Munich, Real Madrid និង Liverpool ។

មាន​ការរំពឹងទុកជា​ច្រើន​ដូច​ៗ​គ្នា​ថាកីឡាកររូបនេះនឹងអាច​ចាកចេញនៅក្រោយ​ពី​បញ្ចប់​រ​ដូវកាល ២០១៩-២០ នេះ​។ ប៉ុន្តែលោក Simon Rolfes នាយកកីឡា Leverkusen មានសុទិដ្ឋិនិយមក្នុងការរក្សាកីឡាករ​ឆ្នើមរបស់ពួកគេជា​បន្ត​ទៀត។ លោកក៏បានរម្លឹក​ដល់​ក្លឹប​ណា​ដែល​ចង់​បាន​កីឡាករ​ឆ្នើម​ម្នាក់​នេះ​ពី​ Leverkusen អោយ​ត្រៀម​កញ្ចប់​លុយ​មហាសាល​អោយ​ហើយ​ទៅ​។

Rolfes បានប្រាប់ Sport1 ថា៖ “យើងមានក្តីសង្ឃឹមហើយយើងចង់អោយ Kai លេងជាមួយយើងបន្ត​ទៀតនៅរដូវកាលក្រោយ។ ​យើងកំពុងពិភាក្សាជាមួយរូប​គេ​បើ​ទោះ​ជា​មាន​ការវាយ​លុក​ពី​បណ្តារ​សារព័ត៌មាន​អេច​អូច​ក៏​ដោយ​។ ប្រសិន​បើ​ជាគេ​ត្រូវ​តែ​ចាកចេញ​ដោយ​ជៀស​មិន​ផុត តម្លៃសម្រាប់កីឡាករកំពូលដូច​ជា​គេ​ដាច់ខាតត្រូវ​តែខ្ពស់”។

សូម​បញ្ជាក់​ថា Kai Havertz រកបាន ១១ គ្រាប់និងបញ្ជូនបាល់បាន ៥ គ្រាប់ពីការបង្ហាញខ្លួន ២៦ លើកនៅ Bundesliga នារដូវកាលនេះ។ គេ​បាន​អវត្ត​មាន​ចេញ​ពី​ការប្រកួត​ដែល​បាន​ចាញ់​ក្រុម Bayern ៤-២ កាលពីថ្ងៃសៅរ៍ដោយសារតែបញ្ហាសាច់ដុំ។ បច្ចុប្បន្ន​ Leverkusen ឈរនៅចំណាត់ថ្នាក់លេខ 5 ក្នុងតារាង Bundesliga តាម​ពី​ក្រោយ​តែ​បីពិន្ទុប៉ុណ្ណោះ​ពី​ក្រុមលេខ ៣ RB Leipzig ។