ក្រុមអធិរាជស Real Madrid បានត្រៀមតែងតាំង លោក Santiago Solari ធ្វើជាអ្នកចាត់ការឈុតធំពេញសិទ្ធ ខណៈគម្រោងនេះក៏បានទទួលការអនុញ្ញាតិពីសហព័ន្ធបាល់ទាត់អេស្ប៉ាញផងដែរ។

យ៉ាងណាក្តីក្រុមជើងឯក La Liga ៣៣សម័យមិនទាន់បានបញ្ចេញសេចក្តីថ្លែងការជាផ្លូវការនៅឡើយទេ ខណៈច្បាប់របស់លីគបាល់ទាត់អេស្ប៉ាញមិនអោយមានគ្រូបង្វឹកបណ្តោះអាសន្នមកដឹកនាំក្រុមលើសពី១៥ថ្ងៃឡើយ។

បុរសជនជាតិអាហ្សង់ទីនវ័យ៤២ឆ្នាំបានជួយអោយក្រុមឈ្នះ៤ប្រកួតជាប់គ្នាហើយ ក្រោយមកដឹកនាំជំនួស លោក Julen Lopetegui ដែលត្រូវបានបណ្តេញចេញពីតំណែងកាលពីខែមុន។

ជាមួយនឹងជ័យជំនះ លើ Melilla នៅពាន Copa del Rey ឈ្នះ Viktoria Plzen នៅ UEFA Champions League និងឈ្នះ Real Valladolid រួមជាមួយ Celta Vigo នៅ La Liga ធ្វើអោយលោក Santiago Solari បានក្លាយជាគ្រូបង្វឹកដែលចាប់ផ្តើមការងារយ៉ាងល្អបំផុតក្នុងប្រវត្តិសាស្ត្ររបស់ Real Madrid៕