ក្រុមកីឡាសីដក់ជម្រើសជាតិកម្ពុជាបានធ្វើឲ្យអន្ដរជាតិមានការភ្ញាក់ផ្អើល ដោយដណ្តើមបានមេដាយមាសក្នុងវិញ្ញាសាបុរស៣ទល់៣នាក់ នៃពានរង្វាន់ឃីងខ័បនៅប្រទេសថៃ ដោយទទួលជ័យជម្នះលើក្រុមអូស្ត្រាលី ២សិត០ ពិន្ទុ ២១ទល់១៨ និង ២៥ទល់២៤។

គួរបញ្ជាក់ថាមុននឹងក្លាយជាម្ចាស់មេដាយមាសនាព្រឹត្តិការឃីងខ័បនៅប្រទេសថៃ ក្រុមកីឡាសីដក់ជម្រើសជាតិកម្ពុជា បានឆ្លងកាត់វគ្គជម្រុះក្នុងពូលដោយបានយកឈ្នះគូប្រជែងជាច្រើន ពួកគេបានបន្ដទម្លាក់ក្រុមអាល្លឺម៉ង់ ដោយលទ្ធផល ២-១ ក្នុងវគ្គខ្វែងពូល មុនបន្ដទម្លាក់ក្រុមសីដក់អូម៉ង់ ដោយលទ្ធផល ២-១ ដូចគ្នា ក្នុងវគ្គពាក់កណ្ដាលផ្ដាច់ព្រ័ត្រ ដើម្បីឡើងទៅជួបអូស្ដ្រាលី នៅវគ្គផ្ដាច់ព្រ័ត្រថ្ងៃនេះ ហើយក៏ឈ្នះអូស្រ្តាលីនឹងដណ្តើមបានមេដាយមាសតែម្តង។

ការប្រកួតក្នុងព្រឹត្តិការឃីងខ័បនៅប្រទេសថៃនេះ ខាងកម្ពុជាបានបញ្ជូនអត្តពលិក ២៦នាក់ទៅចូលរួម ចាប់ពីថ្ងៃទី២៣-៣០ ខែកញ្ញាឆ្នាំ២០១៨ នៅប្រទេសថៃ។ ជាមួយគ្នានេះដែរ នេះគឺជាពានរង្វាន់កម្រិតទី២ផ្នែកលើវិញ្ញាញ្ញា៣នាក់ទល់៣នាក់បុរសកម្រិតទី២ ឬDivision 2ក្នុងការប្រកួតជើងឯកពិភពលោកKing Cup លើកទី៣៣ នៅប្រទេសថៃ៕