ការប្រកួត​បាល់ទាត់ដណ្តើម​ពានរង្វាន់ពិភពលោក World Cup នៅរុស្ស៊ី បាន​បញ្ចប់ទៅហើយ ប៉ុន្តែក្រោយពីបញ្ចប់ មានកីឡាករជម្រើសជាតិនីមួយៗ ចំនួន ១០ កំពុងតែឡើងកូតខ្លាំង តាមរយៈទម្រង់លេងដ៏ល្អរបស់ពួកគេ ក្នុងព្រឹត្តិការណ៍នៅរុស្ស៊ីនោះ។ តើមានកីឡាករណាខ្លះ? តាមដានទាំងអស់គ្នា៖

1. Eden Hazard, ជម្រើសជាតិបែលហ្ស៊ិក និងកំពុងលេងឲ្យ Chelsea

គ្មាន​អ្វីដែល​ជាការលាក់​បាំងទេថា Eden Hazard កំពុងត្រូវបាន​ក្លឹប​យក្សនៅអេស្ប៉ាញ Real Madrid ចាប់អារម្មណ៍ជាខ្លាំង បន្ទាប់ពីបានបង្ហាញ​ទម្រង់​លេងយ៉ាងល្អគួរឲ្យ​ចាប់អារម្មណ៍ ក្នុងព្រឹត្តិការណ៍ World Cup 2018 នៅរុស្សី បើទោះបីជាមិន​អាចជួយ​បែលហ្ស៊ិក ឲ្យលើកពានក៏ដោយ។ ប្រធានក្រុម​ជម្រើសជាតិបែលហ្ស៊ិករូបនេះ បានស៊ុតបញ្ជូលទី ៣គ្រាប់ ជួយ​ assist និង​នាំបាល់ឲ្យកីឡាករផ្សេងៗលេង រហូតដល់ទៅ ៤០ដង។

2. Thomas Meunier, ជម្រើសជាតិបែលហ្ស៊ិក និងកំពុងលេងឲ្យ PSG

បរាជ័យ​របស់​បែលហ្ស៊ិក ជាមួយ​បារាំង នៅវគ្គពាក់កណ្តាល​ផ្តាច់​ព្រ័ត្រ ត្រូវបាន​គេចាត់ទុក​ថា ដោយសារតែអវត្ត​មាន​កីឡាករ Thomas Meunier ដែលជាប្រព័ន្ធការពារដ៏មាំ និង​ដ៏សំខាន់បំផុតមួយ​សម្រាប់លោក Roberto Martinez។ កីឡាករវ័យ ២៦ឆ្នាំរូបនេះ កំពុងជាទីចាប់អារម្មណ៍ពីបណ្តាក្លឹប​នានា ប្រសិនបើគាត់ចាកចេញពី Paris Saint-Germain តែបើ​គាត់នៅ​ក៏ក្លឹប​នៅបារាំងនេះ នឹង​ផ្តល់តំលៃខ្លួនមួយយ៉ាងប្រសើរផងដែរ។​

3. Denis Cheryshev, ជម្រើសជាតិរុស្ស៊ី និងកំពុងលេងឲ្យ Villarreal

Denis Cheryshev បាន​បង្ហាញទម្រង់លេងយ៉ាងល្អស្ទើរមិនគួរឲ្យជឿ នៅពេលដែលរុស្ស៊ី ជួបជាមួយ​អារ៉ាប៊ីសាអូឌីត។ ការពិតទៅ កីឡាកររូបនេះ មិន​ត្រូវជាប់​ក្នុង​ជម្រើស ១១នាក់ដំបូងទេ ប៉ុន្តែដោយសារតែការរបួស​របស់​កីឡាករ​ខ្សែបម្រើ​ស្លាប Alan Dzagoev គេក៏ត្រូវ​ផ្តល់ឱកាសឲ្យ​លេងជំនួ​ស។ ឱកាសនោះ ជាការ​ចាប់ផ្តើមដែល​ធ្វើឲ្យ​គ្រូបង្វឹក​ទុកចិត្តលើរូបគេ។ កាលពីរដូវកាលមុន Villarreal បាន​ឲ្យ​​កីឡាករ​វ័យ ២៧ឆ្នាំនេះ បង្ហាញខ្លួន​ក្នុង លីក La Liga តែ ៩លើកប៉ុណ្ណោះ ក្នុងការ​ប្រកួតទាំង ២៤លើក ប៉ុន្តែពេលនេះ Villarreal កំពុងតែ​រក​វិធីទុកកីឡាកររូបនេះឲ្យនៅបន្ត តាមរយៈការ​តំឡើងតំលៃខ្លួន។

4. Harry Maguire, ជម្រើសជាតិអង់គ្លេស និងកំពុងលេងឲ្យ Leicester

ទោះបីជា មិនបានជួយអង់គ្លេសឲ្យលើកពានមែន តែ Harry Maguire ត្រូវបាន​គេមើលឃើញថា មាន​ជំនាញ​អូសបាល់​ពីលើ​មក​ក្រោម​យ៉ាងជំនាញ។ ជាកីឡាករដែល​លេចចេញពីក្រុម​តូចតាច ហើយ​ធ្វើដំណើរ​ទៅក្រុម Leicester កីឡាករវ័យ ២៥ឆ្នាំនេះ អាចកំពុង​ជា​គោលដៅ​របស់ក្រុម​ធំៗផ្សេងទៀត។ សូម​បញ្ជាក់ថា Harry Maguire ត្រូវបាន​ផ្ទេរចេញពីក្លឹប Hull City កាលពីចុងខែមិថុនាឆ្នាំមុន ក្នុង​តំលៃខ្លួន ១៧លានផោន។

5. Yerry Mina, ជម្រើសជាតិកូឡុំប៊ី និងកំពុងលេងឲ្យ Barcelona

គឺកីឡាករវ័យ ២៣ឆ្នាំនេះហើយ ដែល​ធ្វើឲ្យ​អង់គ្លេស ឈ្នះកូឡុំប៊ីយ៉ាងលំបាកលំបិន​បំផុត នៅវគ្គ ១៦ក្រុម​ចុងក្រោយ ព្រឹត្តិការណ៍ World Cup 2018។ មុន​ World Cup មាន​ដំណឹងថា ក្លឹប Barcelona ចង់​លក់កីឡាករនេះចេញ បន្ទាប់ពីទើបតែទិញ កាលពីខែមករា ដើមឆ្នាំនេះ។ ប៉ុន្តែ នៅពេលដែល Yerry Mina ជួយ​កូឡុំប៊ី បានច្រើនយ៉ាងនេះ អ្នក​គ្រប់គ្រងនៅកីឡដ្ឋាន Camp Nou នៅតែចង់​បន្ត​ឃើញ​កីឡាករដែលលេងល្អនៅផ្នែក​កណ្តាល និង​ខាងក្រោម​នេះ លេងជាមួយ​ខ្លួនទៀត។

6. Raphaël Varane, ជម្រើសជាតិបារាំង និងកំពុងលេងឲ្យ Real Madrid

ជារឿងដ៏អស្ចារ្យ​ណាស់សម្រាប់កីឡាករបារាំងរូបនេះ ព្រោះត្រឹមតែវ័យ ២៥ឆ្នាំ Raphaël Varane ជួយ​ Real Madrid ឲ្យ​លើកពាន​ Champions League រហូតដល់ ៤ដង និងជួយ​ឲ្យ​ជម្រើសជាតិបារាំងលើកពាន World Cup នៅឆ្នាំ ២០១៨។ ការពិតទៅ មុន​ World Cup ក៏ Varane មាន​តំលៃខ្លួន​ថ្លៃស្រាប់ទៅហើយ ប៉ុន្តែពេលក្រោយ World Cup ហើយ គេនឹងកាន់តែមាន​តំលៃខ្លួន​ថ្លៃបំផុត ដែល​អាចស្មើនឹង Cristiano Ronaldo ឬ Neymar បាន។

7. Benjamin Pavard, ជម្រើសជាតិបារាំង និងកំពុងលេងឲ្យ Stuttgart

កាលពី ២ឆ្នាំមុន Benjamin Pavard បាន​ចុះកុងត្រាលេងឲ្យ​ក្លឹប Stuttgart នៅក្របខណ្ឌ Bundesliga ទី២ ហើយ​គេបានត្រឹមតែមើល​បារាំងប្រកួត Euro កាលពីឆ្នាំ ២០១៦ ជាមួយមិត្តភក្តិ នៅតំបន់អ្នក​គាំទ្រ។ ប៉ុន្តែដោយសារតែការរបួស​របស់កីឡាករ Jibril Sidibe ហើយ​នឹង​ការ​បង្ខំ​ឲ្យ​រកកីឡាករម្នាក់ ឲ្យ​ជួយ​នៅផ្នែក​កណ្តាល និង​ខាងក្រោម ទើបធ្វើឲ្យ​កីឡាករវ័យ ២២ឆ្នាំនេះ មាន​ឱកាសបង្ហាញខ្លួនយ៉ាងប្រឹងប្រែង។ Benjamin Pavard ស៊ុតបាន ១គ្រាប់ពេលបារាំង ជួបជាមួយ​អាស្សង់ទីន ហើយ​គ្រាប់បាល់នេះហើយ ធ្វើឲ្យ Bayern Munich ចាប់​អារម្មណ៍ចង់បាន Pavard សម្រាប់រដូវក្តៅក្រោយ។ ប៉ុន្តែ Stuttgart ក៏ហ៊ានឲ្យ​តំលៃ​ខ្លួន​ដល់ទៅជាង ៣០លានផោន ដើម្បី​ឲ្យ​ Pavard បន្ត​នៅជាមួយខ្លួនដែរ។

8. Sime Vrsaljko, ជម្រើសជាតិក្រូអាស៊ី និងកំពុងលេងឲ្យ Atlético Madrid

Sime Vrsaljko លេងមិនសូវបាន​ល្អឲ្យ Atletico Madrid ទេ កាលពីរដូវកាលមុន ហើយ​ក្លឹបនេះ​ ក៏ហាក់បង្ហាញ​អារម្មណ៍ថាមិន​ចង់​ទុក Vrsaljko បន្ត។ ប៉ុន្តែ​ក្រោយពីឃើញ ទម្រង់លេងដ៏​ឆ្លាតវៃ ប្រកបដោយ​ថាមពលរបស់ Sime Vrsaljko ពេលប្រកួ​តវគ្គពាក់កណ្តាលផ្តាច់ព្រ័ត្រជាមួយ អង់គ្លេស ក្លឹបនៅអេស្ប៉ាញមួយនេះ បានពិចារណាឡើងវិញ ពីការចង់ទុក Sime Vrsaljko ក្នុងតំលៃខ្លួនខ្ពស់មួយ។

9. Domagoj Vida, ជម្រើសជាតិក្រូអាស៊ី និងកំពុងលេងឲ្យ Besiktas

Domagoj Vida ផ្ទេរមក​​ក្លឹប Besiktas ក្នុង​តំលៃខ្លួន Free ប៉ុណ្ណោះ កាលពីខែមករា ប៉ុន្តែក្រោយ​ពេល​លេងបានយ៉ាងល្អឲ្យ​ក្រូអាស៊ី ឡើងដល់វគ្គផ្តាច់ព្រ័ត្រ នៅពេលនេះកីឡាករវ័យ ២៩ឆ្នាំនេះ កំពុងត្រូវបាន​ក្លឹប Liverpool ចង់បានឲ្យ​មក​លេងជា​ដៃគូជាមួយ Dejan Lovren ដែលជាមិត្តរួមក្រុម​ក្នុងជម្រើសជាតិក្រូអាស៊ី ក្នុងតំលៃខ្លួន​ប្រមាណ ២០លានផោន។ ប៉ុន្តែ Besiktas បានទាមទារច្រើនជាងនេះ ប្រសិនបើហង្សក្រហម​ ពិតជាចង់បានមែន។

10. Ivan Perisic, ជម្រើសជាតិក្រូអាស៊ី និងកំពុងលេងឲ្យ Internazionale

Ivan Perisic លេង​បាន​ល្អបំផុតសម្រាប់ក្រុម Inter ដូច្នេះមិនមានអ្វីភ្ញាក់ផ្អើលទេ នៅពេលគេអាចលេងល្អឲ្យ​ក្រូអាស៊ីនោះ។ Ivan Perisic ជាកូនសោ​សំខាន់សម្រាប់ Inter បន្ទាប់ពីផ្ទេរពីក្លឹប Wolfsburg។ កន្លងមក មានសេចក្តីរាយការណ៍ថា Manchester United ចង់បាន Ivan Perisic ដែរ ប៉ុន្តែត្រូវបាន Inter ទាមទារតំលៃខ្ពស់ក្នុងការលក់ចេញ៕

ប្រភព៖ The Guardian