នៅយប់នេះ បែលហ្ស៊ិក និងអង់គ្លេស នឹង​ត្រូវជួបគ្នាជាថ្មី នៅវគ្គផ្តាច់ព្រ័ត្រ ដើម្បីដណ្តើម​ចំណាត់​ថ្នាក់លេខ ៣ ពីព្រឹត្តិការណ៍បាល់ទាត់ពានរង្វាន់ពិភពលោក World Cup 2018 ដែលប្រទេសរុស្ស៊ី ធ្វើជាម្ចាស់ផ្ទះ។ ការពិត​ទៅក្រុមទាំង ២ ធ្លាប់​ជួបគ្នាម្តងហើយ ក្នុងវគ្គសន្សំពិន្ទុក្នុងពូល នាព្រឹត្តិការណ៍ World Cup នេះ ដោយកាលណោះ បែលហ្ស៊ិក បានប្រកួតឈ្នះ អង់គ្លេស ១ទល់នឹង ០ ប៉ុន្តែពេលនោះ​ យើងនៅចាំបានថា ក្រុមទាំង២ បានដាក់កីឡាករជម្រើសទី២តែប៉ុណ្ណោះឲ្យចូលលេង ព្រោះពេលនោះ ក្រុមទាំង២ មាន​ពិន្ទុមាំក្នុងដៃ ដើម្បីឡើង​ដល់វគ្គ ១៦ក្រុម​ចុងក្រោយទៅហើយ។ សូមរម្លឹកជូនថា បែលហ្ស៊ិក និងអង់គ្លេស ស្ថិតក្នុងពូល G ជាមួយគ្នាក្នុងព្រឹត្តិការណ៍ World Cup 2018 រួមជាមួយប្រទេស ២ទៀត គឺទុយណេស៊ី និងប៉ាណាម៉ា។

យប់នេះ ក្រៅតែពីការកាត់សេចក្តីដោយ​យក​ចំណាត់​ថ្នាក់លេខ ៣ សម្រាប់​ប្រទេសរៀងៗខ្លួន កីឡាករ ២រូប គឺ Harry Kane របស់អង់គ្លេស វ័យ ២៤ឆ្នាំ និង Romelu Lukaku របស់បែលហ្ស៊ិក វ័យ ២៥ឆ្នាំ ដែលកំពុងមាន​គ្រាប់បាល់ប្រហាក់ប្រហែលគ្នា ក៏ត្រូវ​តែប្រឹងប្រែងដើម្បីដណ្តើម​រង្វាន់ស្បែកជើងមាស ឬ Golden Boot ពីព្រឹត្តិការណ៍នេះផងដែរ។

Harry Kane មក​ដល់​វគ្គពាក់កណ្តាល​ផ្តាច់ព្រ័ត្រ មានគ្រាប់បាល់ស៊ុតបញ្ជូលទីចំនួន ៦គ្រាប់ ដែល ៣គ្រាប់ជាការស៊ុតគ្រាប់ពិន័យ​ប៉េណាំងទី ១១ម៉ែត្រ (មិនរាប់បញ្ជូលការស៊ុតបាល់វគ្គកាត់សេចក្តីដោយ​ប៉េណាំងទី បន្ទាប់ពីវគ្គថែមម៉ោង) និង ៣គ្រាប់ទៀត រកបានដោយ​ការជួយ assist និងរកបានដោយខ្លួនឯង។ សូមរម្លឹកបន្តិច ពីប្រវត្តិរកគ្រាប់បាល់បានក្នុងព្រឹត្តិការណ៍ World Cup 2018 របស់ Harry Kane៖

• អង់គ្លេស 2-1 ទុយណេស៊ី (Harry Kane ស៊ុតបាល់ប៉េណាំងទី បាន ២គ្រាប់)
• អង់គ្លេស 6-1 ប៉ាណាម៉ា (Harry Kane ស៊ុតបញ្ជូលទីបាន ៣គ្រាប់ ដែល ២គ្រាប់​ជាគ្រាប់បាល់ប៉េណាំងទី និង ១គ្រាប់រកបានដោយខ្លួនឯង)
• អង់គ្លេស 1-1 កូឡុំប៊ី (Harry Kane ស៊ុតបញ្ជូលទីបាន ១គ្រាប់ ដែលជាគ្រាប់បាល់ប៉េណាំងទី)

ចំណែក Romelu Lukaku មកដល់វគ្គពាក់កណ្តាល​ផ្តាច់ព្រ័ត្រ គេស៊ុតបញ្ជូល​ទីបាន ៤គ្រាប់ ដោយ​សុទ្ធតែជាគ្រាប់រក​បានដោយខ្លួនឯង។  សូមរម្លឹកបន្តិចពីប្រវត្តិ​រក​គ្រាប់បាល់ក្នុងព្រឹត្តិការណ៍ World Cup 2018 របស់ Lukaku៖

• បែលហ្ស៊ិក 3-0 ប៉ាណាម៉ា (Lukaku ស៊ុតបញ្ជូលទីបាន ២គ្រាប់)
• បែលហ្ស៊ិក 5-2 ទុយណេស៊ី (Lukaku ស៊ុតបញ្ជូលទីបាន ២គ្រាប់)

យ៉ាងណាក៏ដោយ សម្រាប់គ្រូបង្វឹក​ក្រុមបាល់ទាត់ជម្រើសជាតិបែលហ្ស៊ិក លោក Martinez បានបញ្ជាក់ថា លោក​មិន​ចង់ឲ្យ Lukaku ផ្តោតទៅលើពានរង្វាន់ Golden Boot ខ្លាំងពេកនោះទេ ពោលគឺលោក​ចង់ឲ្យក្រុមទាំងមូល ដណ្តើម​យក​ចំណាត់ថ្នាក់លេខ ៣ ខណៈអង់គ្លេស ដែល​ធ្លាប់ប្តេជ្ញាថានឹងយក​ពានរង្វាន់ World Cup 2018 ត្រលប់ទៅផ្ទះវិញ បានអះអាងថា គេនឹង​យកលេខ ៣ឲ្យបាន បំណាច់ថាមិនបានលេខ ១។

ក្រៅពីកីឡាករទាំង ២ដែលមានគ្រាប់បាល់ប្រកៀកប្រកិតគ្នា ក៏នៅមានកីឡាករផ្សេងទៀត ដែលអាចរកគ្រាប់បាល់បាន ៤គ្រាប់ពី World Cup 2018 ដូចជា Cristiano Ronaldo រកបាន ៤គ្រាប់ឲ្យព័រទុយហ្កាល់ ប៉ុន្តែហាលអាវត្រឹមវគ្គ ១៦ក្រុមចុងក្រោយ។ ចំណែក D.Cheryshev របស់រុស្ស៊ី រកបាន ៤គ្រាប់ដែរ ប៉ុន្តែហាលអាវត្រឹមវគ្គ ៨ក្រុមចុងក្រោយ។ ដោយឡែកកីឡាករដែលនៅបន្ត​ផ្សេងទៀត ហើយរកបាន ៣គ្រាប់ រួមមាន Kylian Mbappe និង Antoine Griezmann របស់បារាំង ដែល​ត្រូវប្រកួតវគ្គផ្តាច់ព្រ័ត្រជួបជាមួយ ក្រូអាស៊ី។ យើងមិនអាចដឹងទេថា ប្រសិនបើកីឡាករទាំង២នេះ រកបានម្នាក់ ៣គ្រាប់ ក្នុងការប្រកួតចុងក្រោយ នោះគេក៏ប្រហែលជាអាចមានឱកាសសម្រាប់ Golden Boot Award ដូចគ្នា។ ប៉ុន្តែរឿងនេះ ទំនងជាពិបាកបន្តិច!

គួរជម្រាបជូនថា គិតត្រឹមថ្ងៃទី ១៤ខែកក្កដានេះ តាមរយៈការប្រកួតចំនួន ៦២ប្រកួត គឺ​មានគ្រាប់បាល់ចំនួន ១៦១គ្រាប់ ត្រូវបានស៊ុតបញ្ជូលទីក្នុងព្រឹត្តិការណ៍ World Cup 2018 ដែលបានបើកដំណើរការតាំងពីថ្ងៃទី ១៤ខែមិថុនា នៅប្រទេសរុស្ស៊ី៕