ទោះបីជាក្រុម​បាល់ទាត់ជម្រើសជាតិ​អង់គ្លេស មិន​អាចសម​តាមបំណង ក្នុងការនាំយក​ពានរង្វាន់បាល់ទាត់ពិភពលោក World Cup 2018 មក​ផ្ទះវិញក៏ដោយ ប៉ុន្តែអ្នក​គាំទ្រអង់គ្លេសជាច្រើន​ពាន់នាក់ បាន​ចាត់ទុកថាអង់គ្លេសធ្វើបានល្អបំផុតហើយ។ អង់គ្លេស ២០១៨ ដែល​ប្រមូល​ផ្តុំដោយកីឡាករក្មេងៗ ភាគច្រើនវ័យក្រោម ២៥ឆ្នាំ និង​ដឹកនាំ​ដោយ​គ្រូបង្វឹកវ័យ ៤៧ឆ្នាំ លោក Gareth Southgate បានឡើងដល់វគ្គពាក់កណ្តាល​ផ្តាច់ព្រ័ត្រ​ជាលើកដំបូង គិតចាប់ពីឆ្នាំ ១៩៩០មក។

វាអាចជាភាពអាម៉ាស់បន្តិចសម្រាប់គ្រូបង្វឹក និងកីឡាករអង់គ្លេស ដែល​ត្រូវ​ចាញ់​ក្រូអាស៊ី ២ទល់នឹង១ ក្នុងវគ្គថែមម៉ោង នៅវគ្គពាក់កណ្តាលផ្តាច់ព្រ័ត្រ ហើយមិន​អាចឡើងទៅវគ្គផ្តាច់ព្រ័ត្រ ជួបជាមួយបារាំងបាន។ ប៉ុន្តែ​សម្រាប់អ្នក​គាំទ្រ លោក Gareth Southgate គួរតែទទួលបានកិត្តិនាម​ជាវីរបុរស គួរតែមានការបំពាក់សក្តិយសពីម្ចាស់​ក្សត្រី របស់រាជាណាចក្រអង់គ្លេស។ មានហេតុផល​ជាច្រើន ដែល​អ្នក​គាំទ្រ បាន​សរសេរក្នុងញ្ញត្តិ​មួយ​ស្នើសុំឲ្យ​មានការ​ផ្តល់​រង្វាន់កិត្តិយសណាមួយដល់លោក Gareth Southgate និងក្រុមកីឡាករជម្រើសជាតិ​អង់គ្លេស ពីព្រោះគេគិតថា អង់គ្លេស ២០១៨ បានធ្វើឲ្យប្រិយមិត្តជាច្រើន ទាំងក្នុងប្រទេសអង់គ្លេស និងជុំវិញ​ពិភពលោក រំភើបរីករាយ និង​សាទរជាច្រើន​ប្រកួតមក​ហើយ ទោះបីជាមិន​អាច​ឈ្នះពានរង្វាន់ក៏ដោយ។

មកដល់ថ្ងៃនេះ ញ្ញាត្តិ​ដែល​មានការ​ចុះហត្ថលេខាដោយ​មនុស្សចំនួន ៦,០០០នាក់ ក្នុងគោលដៅ​មនុស្ស ៧,៥០០នាក់ ដើម្បី​ដាក់ទៅកាន់សហព័ន្ធបាល់ទាត់អង់គ្លេសនោះ បាន​សរសេររៀបរាប់ថា៖

«យើង​បាន​ធ្លាក់​ដោយសារក្រូអាស៊ី ប៉ុន្តែតោទាំង៣ (Three Lions) នឹង​ត្រលប់មក​ផ្ទះវិញ ជាមួយ​មុខមាត់ខ្ពស់មួយ បន្ទាប់ពីបានឡើងដល់វគ្គពាក់កណ្តាលផ្តាច់ព្រ័ត្រជាលើកដំបូងតាំងពីឆ្នាំ ១៩៩០មក។ លោក Gareth ត្រូវតែទទួលបានសក្តិយសអ្វីមួយសម្រាប់ការងារដែលគាត់បានធ្វើ។ គាត់គឺជាមនុស្សតែម្នាក់គត់ ដែល​បាននាំក្រុម​ជម្រើសជាតិយើង ដែល​កន្លងមក​តែងតែធ្វើឲ្យយើងអន់ចិត្ត ក្លាយជាក្រុមដែលយើងគួរតែមានមោទនភាពជាមួយ។ … គួរតែគ្មានការបន្ទោសទៀតទេ សម្រាប់ទម្រង់លេងអន់របស់យើង។ គួរតែមិនមានការពិភាក្សាទៀតទេ ថា​កីឡាករយើង គ្មានគ្រូបង្វឹកល្អ។ … លោក​ Gareth លោក​បាន​ធ្វើឲ្យ​អារម្មណ៍របស់ពួកយើង ភ្លេចគិតពីរឿង Brexit រឿងរលកកម្តៅ និង​រឿងរបស់លោក Pat Phelan ហើយ​លោក​គួរតែទទួលបានរង្វាន់កិត្តិយសមួយ។ លោក​ជាអ្នកកីឡាពិតៗ ហើយជាសុភាពបុរស (A True Sportsman, a true gentleman)។ យើងសុំ​ចុះហត្ថលេខាផ្តល់សក្តិយស (the knighthood) សម្រាប់លោក Gareth Southgate ឲ្យសមនឹងអ្វីដែលលោក​គួរតែបាន។» (បកប្រែក្រៅផ្លូវការ)

ក្នុង​សន្និសីទកាសែតមួយ បន្ទាប់ពីចប់ការប្រកួតជាមួយក្រូអាស៊ី លោក Gareth Southgate បាន​និយាយថា៖ «ខ្ញុំមិនគិតថាមនុស្សទាំងអស់ បានយល់ពី​កីឡាករយើងជំនាន់មុននោះទេ។ ការពិតទៅ ពួកគាត់ខ្វល់ខ្វាយពីការលេងឲ្យប្រទេសជាតិ​របស់ពួកគាត់ណាស់ ហើយពួកគាត់ពិតជាមានភាពចាស់ទុំ។ ពួកគាត់ជាកីឡាឆ្នើមៗ ប៉ុន្តែពួកគាត់មិនទាន់បានមក​ដល់កន្លែងដែលយើងបានមកដល់នេះទេ។ ដូច្នេះ យើងអាចដឹងថា ដំណើររបស់ពួកយើងគឺដើរលើ​ទិសដៅត្រូវហើយ (ទោះបីជាយើងមិនអាចបានពាន World Cup មែន)។ … យើង​បាន​ធ្វើឲ្យ​មនុស្សជាច្រើនសប្បាយចិត្ត ប៉ុន្មានសប្តាហ៍មុននេះ។»

សូមបញ្ជាក់ថា អង់គ្លេស នឹង​ត្រូវប្រកួត​ចុងក្រោយ​ក្នុងព្រឹត្តិការណ៍ World Cup 2018 នៅវេលាម៉ោង ៩យប់នេះ (គិតម៉ោងក្នុងប្រទេសកម្ពុជា) ដោយត្រូវជួបគ្នាជាមួយបែលហ្ស៊ិក ដណ្តើមយក​លេខ៣។ ជុំវិញ​ចំណាត់ថ្នាក់នេះ លោក Southgate ក៏បានប្តេជ្ញាចិត្តថា លោក​នឹងនាំកូនក្រុម​របស់លោក ​ដណ្តើម​ចំណាត់ថ្នាក់លេខ ៣ពីបែលហ្ស៊ិកឲ្យបាន៕