1. មហិច្ឆិតា​គ្រូបង្វឹកបារាំង លោក Didier Deschamps

Didier Deschamps បាន​ចាប់​ផ្តើម​នាំបារាំង ចូល​ក្នុងការប្រកួតបាល់ទាត់ដណ្តើម​ពានរង្វាន់​ពិភពលោក World Cup 2018 ជាមួយ​នឹង​កិត្តិនាម​ល្អ ក្នុងចំណោម​ក្រុម​ដែលគេទទួលស្គាល់​ថាខ្លាំងផ្សេងទៀត ដូចជា អាល្លឺម៉ង់ អេស្ប៉ាញ និង​ប្រេស៊ីលជាដើម។ គ្រូបង្វឹកវ័យ ៤៩ឆ្នាំរូបនេះ បាន​នាំពន្លឺឲ្យក្រុម​ជម្រើសជាតិបារាំងជានិច្ច មិន​ដូចអ្វីដែល​អាល្លឺម៉ង់ អេស្ប៉ាញ ប្រេស៊ីល ព័រទុយហ្គាល់ ឬអាស្សង់ទីន បាន​ធ្វើនោះទេ។ បារាំង បាន​ឡើង​ដល់​វគ្គ ១៦ក្រុម​ចុងក្រោយ ជាមួយនឹង​ពិន្ទុ​ដ៏មាំ ដែល​មិន​ប្រផិត​ប្រផើយ​ មិន​បាច់​ប្រជែងខ្លាំង ជារួម​គឺមក​ គឺជាមួយ​ទំនុក​ចិត្ត។ បារាំង ចាប់ផ្តើម​ធ្វើឲ្យអ្នក​គាំទ្រ មើលឃើញ​ថាគេជាក្រុម​ដែលគួរឲ្យទុកចិត្តបំផុត ក្នុងការ​កាន់​ពានរង្វាន់ World Cup 2018 នៅពេលដែលបានទម្លាក់​អតីតក្រុង​រងជើងឯង អាស្សង់ទីន នៅ​វគ្គ ១៦​ក្រុម និង​ទម្លាក់ អ៊ុយរ៉ាហ្កាយ នៅវគ្គ ៨ក្រុម​ចុងក្រោយ។ លោក Deschamps ប្រហែលជាមិនបញ្ចប់មហិច្ឆិតារបស់លោក​នៅត្រឹមប៉ុណ្ណេះទេ។ អ្វីៗនឹងត្រូវបានបញ្ជាក់ ក្នុងការប្រកួត​នៅក្នុងសប្តាហ៍នេះ!

2. មហិច្ឆិតាចង់ក្តោប​ឱកាស​របស់​គ្រូបង្វឹក​បែលហ្ស៊ិក​ លោ​ក​ Roberto Martinez

អតីត​គ្រូបង្វឹកក្រុម​បាល់ទាត់​ក្នុងក្របខណ្ឌនៅអង់គ្លេស Wigan និង Everton រូបនេះ ធ្លាប់​បាន​បញ្ជាក់ថា លោក​មិនអាចជោគជ័យ​ក្នុងជីវិត​ជាអ្នក​គ្រប់គ្រង​នៅក្លឹប​អង់គ្លេស ក៏ព្រោះតែកង្វះធនធានកីឡាករល្អ។ ចុះនៅពេលដែល​លោក​មានកីឡាករបែលហ្ស៊ិក ដែលពោរពេញ​ទៅដោយ​សមត្ថភាពហើយ តើលោក​នឹង​អាច​បញ្ចេញ​សមត្ថភាព ធ្វើឲ្យ​គេកោតសរសើរបានកម្រិតណា? យ៉ាងណាក៏ដោយ គ្រប់គ្នាបានមើលឃើញថា ក្នុង​ការប្រកួត World Cup 2018 កន្លងមក បែលហ្ស៊ិក មិន​ស្រុតចុះនោះទេ ពោល​គឺទម្រង់លេងប្លែក និង​មានភាពរីកចម្រើនជាលំដាប់។​ មហិច្ឆិតារបស់លោកគ្រូបង្វឹកសញ្ជាតិអេស្ប៉ាញរូបនេះ គឺជួយ​បែលហ្ស៊ិក ឲ្យ​ជោគជ័យ អាជីពរបស់លោក​គឺកាន់តែត្រូវបានគេទទួលស្គាល់!

3. ប្រព័ន្ធប្រយុទ្ធ និង​ការពាររបស់បែលហ្ស៊ិក

ជាច្រើនឆ្នាំមក​ហើយ ដែល​បែលហ្ស៊ិក បាន​ប្រឹងប្រែងក្នុងវិស័យ​បាល់ទាត់ ទម្រាំអាចប្រមូល​ផ្តុំ​បាន​កីឡាករ ដែល​ពោរពេញ​ទៅដោយ​សមត្ថភាព​ ទេពកោសល្យ មានគុណសម្បត្តិ​ប្រជែងជាមួយ​ក្រុម​ដែល​មានកីឡាករ​តំលៃខ្លួន​ថ្លៃបំផុត​ ដូចជា Neymar របស់ប្រេស៊ីលជាដើម។

ការប្រកួត​ World Cup នៅក្នុងប្រទេសរុស្ស៊ី នៅពេលនេះ ធ្វើឲ្យ​គេ​បាន​ឃើញ​កីឡាករ​ដ៏អស្ចារ្យ​មួយចំនួន​របស់​បែលហ្ស៊ិក ដែលកំពុងលេងក្នុង​ក្របខណ្ឌ Premier League របស់​អង់គ្លេស ដែល​ក្នុងនោះ មាន​ដូចជា Eden Hazard, Romelu Lukaku និង Kevin De Bruyne ជាដើម។ ប្រព័ន្ធប្រយុទ្ធ និ​ងការពាររបស់​បែលហ្ស៊ិក កាន់តែមាំទៅៗ បន្ទាប់ពីបានប្រកួត​ឈ្នះជប៉ុន នៅវគ្គ ១៦​ក្រុម​ចុងក្រោយ ដោយ​ប្រផិតប្រផើយ ៣ទល់នឹង២។

ពេលនោះ គ្រប់​គ្នាហាក់មើល​មក​ថា បែលហ្ស៊ិក បណ្តោយ​ឲ្យ​ជប៉ុននាំមុខមុន បែលហ្ស៊ិល គឺពិតជាអន់ប្រព័ន្ធការពារណាស់! ប៉ុន្តែគេ​ប្រហែលភ្លេចគិតហើយថា ក្នុងរយៈពេលប្រមាណតែ ៣០នាទីសោះ​ បែលហ្ស៊ិក បែរជាអាចប្រយុទ្ធបាន ៣គ្រាប់មក​វិញ។ ទោះបីជា ប្រផិតប្រផើយ តែបែលហ្ស៊ិក ពិតជាប្តេជ្ញាវាយប្រហារខ្លាំង មិន​បណ្តោយ​ឲ្យ​បាល់ឈាន​ដល់វគ្គថែមម៉ោង ឬកាត់សេចក្តីដោយបាល់ប៉េណាំងទីនោះទេ។ នេះគឺជាអ្វីដែលលោក Martinez ធ្លាប់​និយាយក្នុងសន្និសីទកាសែតថា លោក​មិន​អនុញ្ញាតឲ្យ​កូន​ក្រុម​របស់​លោក​ឈានទៅរក​ការកាត់សេចក្តីដោយ​បាល់ប៉េណាំងទីនោះទេ ព្រោះវាជាពេលរន្ធត់បំផុត ដែល​ទំនងជាជាសម្ពាធដ៏ធ្ងន់ធ្ងរសម្រាប់អ្នក​ចាំទីរបស់លោក និង​កីឡាករទាំងអស់។ និយាយ​ពីជំនួបជាមួយប្រេស៊ីលវិញ ទោះបីជាមានការសម្រុកពីខ្សែប្រយុទ្ធសាំបាយ៉ាងណា ក៏បែលហ្ស៊ិក នៅតែប្រឹងទប់/ការពារ ទម្រាំអាចឈ្នះក្នុងលទ្ធផល ២ទល់នឹង១ ដែលគួរជាទីមោទន​។

4. ខ្សែប្រយុទ្ធរបស់បារាំង និង​កីឡាករកំពូលល្បឿន Mbappe

Kylian Mbappe កើ​តមិនទាំងទាន់​ជំនាន់ដែលបារាំងលើកពានឆ្នាំ ១៩៩៨​ផង ពោលគឺគេទើបតែមានអាយុ ១៩ឆ្នាំប៉ុណ្ណោះ។ ខ្សែប្រយុទ្ធរូបនេះ កំពុងតែក្លាយជាទីចាប់អារម្មណ៍បំផុត ដោយសារតែល្បឿនដ៏លឿន​របស់គេ និង​ទម្រង់នៃការគ្រប់គ្រងបាល់។ Mbappe ថែមទាំងមានដៃគូប្រយុទ្ធ​ល្អដូចជា Antoine Griezmann, Olivier Giroud និង​ Paul Pogba ដែល​ពួកគេ​ទាំង ៣ច្រើន​តែលេងក្នុងជម្រើស ១១នាក់ដំបូង តែពុំដណ្តើម​បាល់គ្នាស៊ុតនោះទេ។ ខ្សែប្រយុទ្ធទាំង ៣នេះ ត្រូវបាន​រំពឹង​ថា នឹង​ជា​ព្រួញ​ទម្លុះជញ្ជាំង​ការពារដ៏មាំរបស់បែលហ្ស៊ិក។ គ្មានអ្នក​ណាអាចឆ្លើយនឹង​សំណួរថា តើ​ប្រព័ន្ធប្រយុទ្ធរបស់បារាំងខ្លាំង ជាង​ប្រព័ន្ធការពារ​របស់បែលហ្ស៊ិកឬទេ​? ក្រុម​ទាំង២ មាន​សមត្ថភាពប្រហាក់ប្រហែលគ្នាមែនទែន!

5. សម្ពាធ​​របស់លោក Thierry Henry

Thierry Henry គឺជាវីរបុរស​របស់បារាំង! លោក​បានជួយ​ឲ្យ​បារាំង លើកពានរង្វាន់​ World Cup កាលពីឆ្នាំ ១៩៩៨ និ​ងពានរង្វាន់​បាល់ទាត់​ទ្វីបអឺរុប។ ក្នុងនោះ លោក Henry ក៏ជា​អតីតកីឡាករដែល​ស៊ុតបញ្ជូលទីបានច្រើន​ជាងគេឲ្យ​បារាំងផងដែរ​។ លោក Henry ត្រូវបាន​ពលរដ្ឋបារាំង ស្រលាញ់ និង​ផ្តល់​តំលៃ​បំផុត ព្រោះ​គាត់ជាតំណាងជោគជ័យ​សម្រាប់បារាំង។ ប៉ុន្តែពេលនេះ លោក Henry គឺជា​ជំនួយ​ការគ្រូបង្វឹក​របស់បែលហ្ស៊ិក។ នេះគឺជាសម្ពាធមួយ​សម្រាប់រូបគាត់ ដែល​ត្រូវតែបែងចែក​រវាងទំនួល​ខុសត្រូវលើកាតព្វកិច្ច និង​រវាង​ប្រទេសជាតិ។ កន្លងមក Mbappe ធ្លាប់​ត្រូវគេ​ប្រដូចថាជា Henry កាលនៅពីតូច ហើយកីឡាករវ័យក្មេងរូបនេះ ក៏បានចាត់ទុក Henry ថាជាមនុស្សដែលមានឥទ្ធិពលបំផុត​​សម្រាប់គេ​ ​ក្នុងពិភពបាល់ទាត់។ ពេលវេលានេះ ប្រសិនបើ​បារាំង ឈ្នះ ឬ ចាញ់ លោក Henry ប្រហែលជា​ត្រូវ​យំដូចគ្នា ប៉ុន្តែយើងពិតជាពិបាក​ដឹងឲ្យ​ច្បាស់ណាស់ថា តើគាត់យំដោយអារម្មណ៍បែបណាឲ្យពិតប្រាកដ!

វិភាគ៖ Admin សុខភារី