ក្រុមហ៊ុន​លក់​សម្ភារៈកីឡាដ៏ល្បី​របស់អាល្លឺម៉ង់ Adidas បាន​ប្រកាស​ក្នុងសប្តាហ៍នេះថា ខ្លួន​វ៉ារផ្តាច់លើ​គូប្រជែង គឺក្រុមហ៊ុន Nike ក្នុងការ​ឧបត្ថម្ភសម្លៀកបំពាក់ ដល់​​ក្រុម​បាល់ទាត់​ជម្រើស​ជាតិ សម្រាប់ការ​ប្រកួតបាល់ទាត់ពិភពលោក World Cup នៅប្រទេសរុស្ស៊ី ដែល​នឹង​ចូល​មក​ដល់​ នាប៉ុន្មាន​សប្តាហ៍ទៀត។ តាមការ​ចុះផ្សាយ​របស់​គេហទំព័រ Independent ក្រុម​ហ៊ុន Adidas ត្រូវធ្វើជាម្ចាស់ sponsor ដល់​ក្រុម​បាល់ទាត់​ជម្រើសជាតិ​ចំនួន ១២ ខណៈក្រុមហ៊ុន Nike ឧបត្ថម្ភ​ចំនួន ១០ និង Puma ឧបត្ថម្ភចំនួន ៤ក្រុម។ ក្រៅតែពីឧបត្ថម្ភសម្លៀកបំពាក់ Adidas ក៏ជា​ម្ចាស់​ឧបត្ថម្ភផ្លូវការមួយ​ ​សម្រាប់​ព្រឹត្តិការណ៍បាល់ទាត់​ពិភពលោកនៅឆ្នាំ ២០១៨​ទាំងមូល​តែម្តង។

យ៉ាងណាក៏ដោយ នាយកប្រតិបត្តិ​ក្រុម​ហ៊ុន Adidas លោក Kasper Rorsted បាន​បង្ហាញ​កង្វល់​ពី​ការ​ជះ​ឥទ្ធិពលអាក្រក់ លើ​ការ​រឹតត្បឹត​​ហិរញ្ញវត្ថុរបស់ខ្លួន ដោយ​សារ​ការ​ប្រកួតបាល់ទាត់ពិភពលោក​លើកនេះ ធ្វើឡើងនៅប្រទេសរុស្ស៊ី។ រុស្ស៊ី ដែល​ជាប្រទេសមាន​សេដ្ឋកិច្ចយ៉ាងស្មុគស្មាញសម្រាប់វិនិយោគិន​ពីអឺរុប។​ ប៉ុន្តែលោក Rorsted មាន​សុទិដ្ឋិនិយម​ថា យ៉ាងហោចណាស់ ក៏លោក​អាច​បង្ហាញពី​ម៉ាក​ផលិត​ផល​របស់ខ្លួន ឲ្យ​សកលលោកទាំងមូល​បាន​ឃើញផងដែរ។

គួរជម្រាបជូនថា កាលពីការប្រកួត​ World Cup ឆ្នាំ ២០១៤ ដែល​ប្រេស៊ីល ធ្វើជាម្ចាស់ផ្ទះ Adidas អាច​រក​បាន​ចំណូលពីការ​លក់​សម្ភារៈកីឡារបស់ខ្លួន បាន​យ៉ាង​ខ្ពស់ និង​ឆាប់រហ័ស​ជាងឆ្នាំណាៗទាំងអស់។ កាលណោះ Adidas អាចលក់​បាល់ទាត់រហូត​ដល់ទៅ ១៤លានគ្រាប់ ខណៈសម្លៀក​បំពាក់​ក្រុម​ជម្រើសជាតិ​នៃប្រទេសនីមួយៗ លក់​បាន​ដល់ទៅ ៨លានឈុត​ (គិតតែក្នុងប្រទេសប្រេស៊ីលប៉ុណ្ណោះ)។

ការ​ឧបត្ថម្ភ​លើ​ការ​ប្រកួត​បាល់ទាត់ពិភពលោក​​ គឺជាគោលការណ៍​ដ៏​សំខាន់​បំផុត​សម្រាប់​ក្រុមហ៊ុន​អាល្លឺម៉ង់នេះ។ គេ​បាន​ផ្គត់ផ្គង់​ដល់​ការប្រកួតបាល់ទាត់ពិភពលោក តាំងពីឆ្នាំ ១៩៧០មក រហូត​មក​ដល់​សព្វថ្ងៃ ហើយ​ក៏បាន​ចុះកិច្ច​ព្រម​ព្រៀង​ធ្វើជាអ្នក​ឧបត្ថម្ភ ដល់​ឆ្នាំ ២០៣០​ផងដែរ៕