ប្រភពពីគណៈកម្មការប្រកួតបាល់ទាត់ជាតិកម្ពុជាបានបញ្ជាក់ថា ប្រធានក្រុមបឹងកេត ឃួន ឡាបូរ៉ាវី បានឈានដល់ការព្រមព្រៀងលក្ខខណ្ឌផ្ទាល់ខ្លួនដើម្បីចូលរួមក្លិប Surat Thani FC នៅប្រទេសថៃ សម្រាប់ជុំទី២នៃរដូវកាល២០១៨។

តារាជើងចាស់នៃក្រុមជម្រើសជាតិកម្ពុជាដែលនឹងឈានចូលវ័យ៣០ឆ្នាំនាខែសីហាខាងមុខ អះអាងថាក្លិបថៃមួយនេះចង់បានរូបគេខ្លាំងនិងធានាកៅអីជម្រើស១១នាក់ដំបូងជាប់លាប់ដល់រូបគេ។

បូរ៉ាវី ដែលបានទៅធ្វើតេស្តនៅក្លិបនៃលីគកំពូលថៃ Ratchaburi Mitr Phol ម្ដងក្នុងខែមេសាកន្លងទៅ និយាយថា៖ «ខ្ញុំចង់សាកល្បងលេងនៅក្រៅប្រទេស តែក៏មិនចង់បានត្រឹមអង្គុយមើលការប្រកួតដែរ គឺខ្ញុំចង់លេងក្នុងជម្រើស១១នាក់ដំបូង។ គ្រូបង្វឹកចង់បានខ្ញុំនិងធានាកៅអីជម្រើសដំបូងដល់ខ្ញុំ»។

ម្ចាស់ស្បែកជើងមាសមិត្តហ្វូនខេមបូឌានលីគឆ្នាំ២០១៣និងស្បែកជើងមាសពានរង្វាន់សម្ដេចហ៊ុនសែនឆ្នាំ២០១១,២០១២,២០១៤និង២០១៧ បន្ថែមថាគ្រូបង្វឹក Monthien Morrakot ចង់ឱ្យខ្លួន   ចូលលេងប្រកួតដំបូងនៅថ្ងៃទី៩ខែមិថុនា ដែលជាការប្រកួតទី១នៃជុំទី២ក្នុងក្របខ័ណ្ឌ Thai League 3។

សូមបញ្ជាក់ថា ក្លិប Surat Thani FC កំពុងប្រកួតប្រជែងក្នុងលីគទី៣ប្រទេសថៃ៕

ប្រភព៖ CNCC