អ្នកចាត់ការ Manchester City លោក Pep Guardiola និយាយថា ពេលវេលារបស់លោកនៅក្លិបនឹង ‘មិនគ្រប់ជ្រុងជ្រោយ’ ប្រសិនបើពួកគេបរាជ័យក្នុងការឈ្នះពានរង្វាន់ Champions League ។

លោក Guardiola បានបន្តកុងត្រាជាមួយ Man City ដល់ឆ្នាំ ២០២៥ ខណៈរដូវកាល Premier League កំពុងសម្រាកសម្រាប់ World Cup។

Man City បានឈ្នះពានរង្វាន់ធំៗចំនួន ៩ចាប់តាំងពីលោក Pep បានក្លាយជាអ្នកចាត់ការក្នុងឆ្នាំ២០១៦ ប៉ុន្តែពួកគេមិនទាន់ឈ្នះពានរង្វាន់អឺរ៉ុបណាមួយនៅឡើយទេ។

ក្រុមរហស្សនាមមេឃខៀវ បានខិតជិតបំផុតក្នុងការឈ្នះពានរង្វាន់ Champions League ក្នុងឆ្នាំ ២០២១ ប៉ុន្តែត្រូវបាន Chelsea ផ្តួលនៅវគ្គផ្តាច់ព្រ័ត្រ។

ក្រៅពីការបរាជ័យចុងក្រោយក្នុងប្រទេសព័រទុយហ្គាល់ ពួកគេត្រូវបានផ្តួលដោយ Real Madrid ក្នុងវគ្គពាក់កណ្តាលផ្តាច់ព្រ័ត្រកាលពីរដូវកាលមុន ហើយបានធ្លាក់ចេញនៅវគ្គ ១ភាគ៤ ផ្តាច់ព្រ័ត្រចំនួន៣ដង។

លោក Guardiola បាននិយាយថា “៖ មិនមែនតែមួយហ្នឹងទេ ប៉ុន្តែខ្ញុំទទួលស្គាល់ថាវាជាពានរង្វាន់ដែលយើងចង់បាន ហើយរយៈពេលរបស់ខ្ញុំនៅទីនេះនឹងមិនពេញលេញទេ ប្រសិនបើយើងមិនឈ្នះវា។ ខ្ញុំ​នឹង​ធ្វើ​អ្វី​គ្រប់​យ៉ាង​នៅ​ពេល​ដែល​យើង​មាន​ជាមួយ​គ្នា ប៉ុន្តែ​ខ្ញុំ​និយាយ​ដូច​គ្នា​មុន​នេះ​ដែរ វា​ជា​ពាន​ដែល​យើង​មិន​ទាន់មាន ហើយ​យើង​នឹង​ព្យាយាម​ធ្វើ​វា ខ្ញុំ​មាន​អារម្មណ៍​ថា​ពួក​គេ​នឹង​ទទួល​បាន​វា​គ្រាន់តែយូរឬឆាប់​។”

Man City ត្រូវប៉ះ RB Leipzig របស់អាល្លឺម៉ង់ក្នុងការប្រកួតវគ្គ១៦ក្រុមចុងក្រោយនៃរដូវកាលនេះ៕