Barcelona បានឈានដល់កិច្ចព្រមព្រៀងជាមួយខ្សែការពារ Dani Alves ពោល៥ឆ្នាំបន្ទាប់ពីគេបានចាកចេញពី Nou Camp ទៅ Juventus ។

Alves ដែលបានឈ្នះជើងឯកក្របខណ្ឌ La Liga ៩ដងជាមួយ Barca, Juve និង Paris St-Germain នឹងមកជួយក្រុមលោក Xavi Hernandez ដោយឥតតម្លៃខ្លួនសម្រាប់រដូវកាល ២០២១/២០២២ ។

កីឡាករប្រេស៊ីលរូបនេះបានចំណាយពេល៨ឆ្នាំនៅ Barcelona ចន្លោះឆ្នាំ២០០៨ និង ២០១៦ ហើយឈ្នះ La Liga ៦ដង។

Alves បានឈ្នះជើងឯក Champions League ៣ដង និង Copa del Rey ៤ដង។

Barcelona បានពណ៌នា Alves ថាជា “៖ខ្សែការពារស្តាំដ៏អស្ចារ្យបំផុតក្នុងប្រវត្តិសាស្ត្រ Barca។

សេចក្តីថ្លែងការណ៍បានបន្ថែមថា “៖ កីឡាករប្រេស៊ីលនឹងចូលរួមការហ្វឹកហាត់ចាប់ពីសប្តាហ៍ក្រោយ តែទាល់តែខែមករា ទើបអាចចូលលេងបាន។”

សរុបមក Alves បានឈ្នះពានរង្វាន់ចំនួន២៣គ្រឿងអំឡុងការលេងលើកដំបូងនៅ Barca រួមទាំង FIFA Club World Cups ៣ដង, Spanish Super Cups ៣ដង និង European Super Cup ៤ដង។

គេបានឈ្នះ Serie A ជាមួយ Juventus រដូវកាល ២០១៦-១៧ និង Ligue 1 ជាមួយ PSG ក្នុងឆ្នាំ ២០១៧-១៨ និង ២០១៨-១៩។

Alves បានត្រលប់មកប្រេស៊ីលវិញក្នុងឆ្នាំ២០១៩ លេងឲ្យ Sao Paulo ហើយនៅក្នុងខែសីហាកន្លងទៅ ក៏បានធ្វើជាប្រធានក្រុមប្រេស៊ីល ឈ្នះមេដាយមាសក្នុងព្រឹត្តិការណ៍អូឡាំពិក ២០២០។

កិច្ចសន្យារបស់គេនៅ Sao Paulo ត្រូវបានបញ្ចប់នៅក្នុងខែកញ្ញា បន្ទាប់ពីមានភាពចម្រូងចម្រាសលើប្រាក់ខែដែលមិនបានបើក៕